Dəniz Mall-dakı Bagel Bar Baku müştəri ilə hesablaşmada anlaşılmazlıq yaradıb. AzPost-a daxil olan şikayətə görə, qonağı üçün sifariş edilmiş San Sebastian deserti 10 AZN qiymətində olsa da, hesab 17 AZN gəlib çıxıb. Səbəb desertin üzərinə Nutella və dondurma əlavələrinin əlavə olunmasıdır, hər biri 3-3,50 AZN-dən qiymətləndirilib.
Müştəri qeyd edir ki, ofisiant əvvəlcədən əlavə ödəniş barədə xəbər verməyib. Onun sözlərinə görə, “Əgər əlavə ödəniş olacağını bilsəydim, özümdən soruşardım və istəmədiyim əlavələri sifariş etməzdim.”
Şikayətçi həmçinin deyir ki, çay sifarişində də ölçü barədə əvvəlcədən soruşulmur, böyük fincan gətirilir və bu da əlavə xərclərə səbəb olur. O vurğulayır ki, belə davranış qonağa hörmətsizlikdir, xüsusilə müştəri ilə birlikdə gələn şəxslər üçün gülünc vəziyyət yarada bilər.
Müştəri hesab edir ki, 2 fincan çay və 2 desert üçün 40 AZN-ə yaxın ödəniş absurd və yersizdir, xüsusilə müştəri əlavə ödəniş barədə xəbərsiz qaldıqda. Onun fikrincə, restoranın belə yanaşması müştəri etibarına xələl gətirir və xidmətdə ciddi çatışmazlıqdır.
