Bu gün İlham Əliyevin Azərbaycan Respublikasının Prezidenti seçilməsindən 22 il ötür. 2003-cü il oktyabrın 15-də xalqın etimadı ilə dövlətin ali rəhbərliyinə gələn İlham Əliyevin dövrü müasir Azərbaycanın ən mühüm inkişaf mərhələsi kimi tarixə düşüb.
İlham Əliyev hakimiyyətə gəldiyi ilk gündən atası, ümummilli lider Heydər Əliyevin müəyyən etdiyi siyasi kursa sadiq qalacağını bəyan etdi. Bu siyasətin əsasını dövlətçiliyin möhkəmləndirilməsi, iqtisadi sabitlik və milli maraqlar üzərində qurulan müstəqil siyasət təşkil edirdi.
2000-ci illərin əvvəllərində Azərbaycan üçün başlıca vəzifə iqtisadiyyatı sabitləşdirmək və sosial rifahı yüksəltmək idi. Bu məqsədlə Prezident İlham Əliyev enerji strategiyasını uğurla reallaşdırdı.
2006-cı ildə istifadəyə verilən “Bakı–Tbilisi–Ceyhan” neft, 2007-ci ildə işə salınan “Bakı–Tbilisi–Ərzurum” qaz kəmərləri ölkəni qlobal enerji xəritəsinin əsas oyunçularından birinə çevirdi. Bu layihələr Azərbaycanın beynəlxalq nüfuzunu artırmaqla yanaşı, ölkəyə milyardlarla dollar gəlir gətirdi və sosial-iqtisadi inkişafın əsas dayaq nöqtəsi oldu.
2010-cu illər İlham Əliyevin siyasi kursunda modernləşmə və dövlət idarəçiliyinin təkmilləşdirilməsi mərhələsi kimi yadda qaldı. Bu dövrdə: “ASAN xidmət” modeli dünyada innovativ dövlət xidmətlərinin nümunəsinə çevrildi; infrastruktur layihələri, yol və enerji proqramları, kənd və regionların inkişafı istiqamətində böyük addımlar atıldı; Silahlı Qüvvələrin gücləndirilməsi, hərbi sənaye kompleksi və milli müdafiə strategiyası formalaşdı.
Preziden ğz kredosunu belə elan edib: “Biz müstəqil siyasət yürüdürük və bu siyasətin mərkəzində Azərbaycan xalqının maraqları dayanır.”
2020 – Qələbə ili və tarixi dönüş
İlham Əliyevin prezidentliyinin ən parlaq səhifəsi şübhəsiz ki, 2020-ci ilin Vətən müharibəsində qazanılmış Qələbədir.
44 gün davam edən müharibə, antiterror əməliyyatı nəticəsində Azərbaycan torpaqlarını işğaldan qurtardı, ərazi bütövlüyünü bərpa və tarixi ədaləti təmin etdi. Bu Qələbə təkcə hərbi sahədə deyil, həm də diplomatik, ideoloji və milli birlik baxımından dönüş nöqtəsi oldu.
Prezident İlham Əliyevin adı həmin günlərdə yalnız dövlət başçısı kimi deyil, milli lider və müzəffər Ali Baş Komandan kimi tarixə yazıldı. Onun liderliyi sayəsində Azərbaycan Cənubi Qafqazın aparıcı siyasi və hərbi gücünə çevrildi. Bu, həm regionda yeni siyasi reallıqlar yaratdı, həm də Azərbaycanın beynəlxalq mövqelərini gücləndirdi.
Qələbədən sonra İlham Əliyevin qarşısında yeni mərhələ – azad edilmiş torpaqların dirçəldilməsi və böyük qayıdış vəzifəsi durdu.Hazırda Füzuli, Zəngilan, Laçın və Ağdamda yeni şəhərsalma layihələri, “ağıllı kənd” və “yaşıl enerji” zonaları, Zəngəzur dəhlizi və regional nəqliyyat layihələri həyata keçirilir. Bu, Azərbaycanın gələcək iqtisadi xəritəsini dəyişəcək miqyasda layihələrdir.
Prezident İlham Əliyevin 22 illik siyasi xəttinin mahiyyətini bir neçə istiqamətdə ifadə etmək olar:
Bunlar:
Müstəqilliyin qorunması və suveren qərarvermə; Milli maraqlara əsaslanan xarici siyasət; İqtisadi sabitlik və sosial rifahın artırılması; Ordu quruculuğu və təhlükəsizlik prioriteti; Milli kimlik və mədəni dəyərlərin qorunmasıdır.
Prezident öz çıxışında bu siyasi xəttiin fundamental əsasını qeyd edib: “Azərbaycanın siyasəti gücümüzə, iradəmizə və xalqımızın birliyinə əsaslanır. Biz bu yolla gələcək nəsillərə güclü dövlət miras qoyacağıq.”
Prezident İlham Əliyevin prezidentliyi dövründə Azərbaycan regional lider, qlobal enerji mərkəzi və müstəqil siyasət yürüdən dövlət kimi tanınıb. Əgər 1990-cı illər müstəqilliyin qorunması mərhələsi idisə, 2003–2025 dövrü müstəqil və güclü dövlət modelinin formalaşması mərhələsi kimi tarixə düşür.
Bu illər həm iqtisadi yüksəliş, həm hərbi qələbə, həm də milli birliyin bərqərar olduğu dövr kimi yadda qalacaq.
“Analitik” Təhlil Mərkəzi
