qaz nəqli
2025-ci ilin ilk doqquz ayı ərzində Çin Xalq Respublikası Rusiyadan neft idxalını əhəmiyyətli dərəcədə azaldıb.
AzPost xəbər verir ki, TASS agentliyinin məlumatına görə, ötən ilin eyni dövrü ilə müqayisədə bu göstərici 8,1 faiz enərək 74,04 milyon ton səviyyəsində qeydə alınıb.
Çinin Baş Gömrük İdarəsinin hesabatında qeyd olunur ki, idxal olunan xam neftin maliyyə dəyəri 21 faiz azalaraq 37,55 milyard ABŞ dolları təşkil edib. Bu isə Rusiya neftinə olan tələbatda hiss olunan zəifləmənin göstəricisi hesab olunur.
Buna baxmayaraq, Rusiya hələ də Çinin əsas neft tədarükçüsü statusunu qoruyur. Siyahıda ikinci yeri Səudiyyə Ərəbistanı (59,52 milyon ton), üçüncü yeri isə Malayziya (51,23 milyon ton) tutur. İlk altılığa həmçinin İraq (49,28 milyon ton), Braziliya (33,33 milyon ton) və Oman (26,22 milyon ton) daxildir.
Maraqlıdır ki, sentyabr ayında Çin tərəfindən Rusiya neftinin alınması avqustla müqayisədə 4,3 faiz artaraq 8,28 milyon tona çatıb. Pul ifadəsində bu artım 5,2 faiz təşkil edərək 4,06 milyard dollar olub.
Qeyd edək ki, 2024-cü ilin yekunlarına görə Çin Rusiyadan neft idxalını 1,3 faiz artıraraq 108,47 milyon ton səviyyəsinə çatdırmışdı. Lakin həmin dövrdə digər ölkələrdən ümumi idxal həcmi 1,9 faiz azalmış və 553,41 milyon ton olmuşdu.
