Qış aylarında aşağı temperatur avtomobil akkumulyatorunun tutumunu əhəmiyyətli dərəcədə azaldır və mühərrikin hər işə salınması batareyadan çox enerji tələb edir. AzPost xəbər verir ki, bu barədə mütəxəssislər Lenta.ru-ya açıqlamalarında bildiriblər.
Qeyd olunub ki, şaxtalı hava, qısa məsafəli şəhərdaxili gedişlər və istilik sistemlərinin daimi işləməsi akkumulyatora əlavə yük yaradır. Akkumulyatorun texniki vəziyyəti avtomobilin soyuq havada problemsiz işə düşməsində əsas rol oynayır.
Mütəxəssislər akkumulyatorun enerji balansını qorumaq üçün vaxtaşırı uzun məsafəli səfərlərin faydalı olduğunu bildiriblər. Mühərrik işə salındıqdan sonra avtomobilin 5–10 dəqiqə ərzində boş rejimdə işləməsi, bu zaman enerji tutumlu qurğuların aktiv edilməməsi tövsiyə olunur. Havanın temperaturu -30 dərəcədən aşağı olduqda akkumulyatorun gecə vaxtı avtomobildən çıxarılaraq isti mühitdə saxlanması məqsədəuyğun hesab edilir. Mexaniki sürətlər qutusuna malik avtomobillərdə isə işə salma zamanı muftanın sıxılması məsləhət görülür.
Bildirilir ki, starteri fasiləsiz şəkildə 5–7 saniyədən artıq çevirmək olmaz. Mühərrik işə düşmədikdə təxminən bir dəqiqəlik fasilə verilməli, bundan sonra növbəti cəhd edilməlidir. Ardıcıl və tez-tez edilən cəhdlər akkumulyatorun sürətlə boşalmasına səbəb olur.
Qış mövsümünə başlamazdan əvvəl akkumulyatorun texniki vəziyyətinin yoxlanması tövsiyə edilir. Orta istismar müddəti 3–7 il arasında dəyişir. Akkumulyatorun korpusu çat və şişkinlik baxımından nəzərdən keçirilməli, klemmlərdəki gərginlik isə mühərrik söndürülmüş vəziyyətdə ölçülməlidir. 12,6–12,8 volt göstəricisi tam dolu vəziyyəti, 12,4 volt resurs itkisini, 12 volt və daha aşağı göstəricilər isə dərin boşalmanı göstərir.
Soyuq iqlim şəraiti olan bölgələr üçün istehsalçı təlimatında icazə verildiyi halda 0W və ya 5W indeksli mühərrik yağlarının istifadəsi tövsiyə olunur. Bu tip yağlar aşağı temperaturda axıcılığını saxlayır və mühərrikin işə salınmasını asanlaşdırır.
