Ukraynanın sabiq baş naziri, “Batkivşina” Partiyasının lideri Yuliya Timoşenko barəsində yeni və ciddi cinayət işi gündəmə gəlib.
AzPost xəbər verir ki, yerli mediada yayılan məlumatlara görə, siyasətçi Ukrayna Cinayət Məcəlləsinin “vəzifəli şəxsə qanunsuz maddi fayda vermə” maddəsi üzrə istintaqa cəlb oluna bilər. Bu maddə üzrə maksimum cəza 10 ilədək azadlıqdan məhrumetmədir.
İstintaq prosesinin aktiv mərhələyə keçməsi fonunda Timoşenkonun rəhbərlik etdiyi “Batkivşina” Partiyasının mərkəzi ofisində, eləcə də onun şəxsi iqamətgahında hüquq-mühafizə orqanları tərəfindən genişmiqyaslı axtarışlar aparılıb. Ukrayna mediası bildirir ki, əməliyyatlarda Milli Antikorrupsiya Bürosu (NABU) və Xüsusi Antikorrupsiya Prokurorluğunun (SAP) əməkdaşları iştirak ediblər.
Ukrayna Ali Radasının deputatı Aleksey Qonçarenkonun iddiasına görə, antikorrupsiya qurumları partiya ofisində demək olar ki, bütün gecə boyu işləyib. Bununla belə, rəsmi qurumlar hələlik istintaqın məhz Yuliya Timoşenkoya yönəlib-yönəlmədiyini açıq şəkildə təsdiqləməyiblər. Rəsmi açıqlamalarda yalnız parlament fraksiyalarından birinin rəhbərinin deputatların ələ alınmasında şübhəli bilindiyi qeyd olunub.
Qeyd edək ki, Yuliya Timoşenko üçün bu, hüquq-mühafizə orqanları ilə ilk qarşıdurma deyil. O, 2001-ci ildə qaz qaçaqmalçılığı ittihamı ilə həbs edilmiş və təxminən 40 gün azadlıqdan məhrum olunmuşdu. Daha sonra, 2011-ci ildə vəzifə səlahiyyətlərini aşmaqda günahlandırılan Timoşenko iki ildən artıq müddətdə həbsdə qalmışdı. Həmin iş beynəlxalq aləmdə geniş rezonans doğurmuş, Avropa qurumları prosesi siyasi motivli hesab etmişdi.
Son istintaq çərçivəsində yalnız Timoşenkonun deyil, hakim “Xalqın Xidmətçisi” Partiyasının fraksiya rəhbəri David Araxamiyanın da adının hallanması diqqət çəkir. Ukrayna mətbuatı onunla bağlı da oxşar axtarış tədbirlərinin aparıldığını yazır.
