İlin əvvəlində qoyulan bir çox məqsədin zamanla həyata keçməməsinin əsas səbəblərindən biri insanın öz daxili qorxularıdır. AzPost xəbər verir ki, neyropsixoloq Yekaterina Orlova bu mövzuda açıqlama verib.
Mütəxəssisin sözlərinə görə, insanlar böyük hədəflər müəyyən edərkən tez-tez özlərinə inamsızlıq hissi yaşayırlar. Bu zaman insanın beynində qoruyucu mexanizm işə düşür və mümkün uğursuzluq, məyusluq və yorğunluqdan qaçmaq üçün planların icrasına mane olur.
Psixoloq bildirib ki, xüsusilə zehni fəaliyyətlə bağlı yeni başlanğıclar orqanizm üçün ciddi enerji tələb edir. Beyin isə bu yükü risk kimi qəbul edərək, insanı passivliyə sürükləyir və nəticədə məqsədlər təxirə salınır və ya tamamilə unudulur.
Yekaterina Orlova hesab edir ki, bu vəziyyətdən çıxış yolu böyük və iddialı məqsədləri kiçik, sadə və təkrarlanan addımlara bölməkdir. Onun fikrincə, insan diqqətini uzaq nəticəyə deyil, gündəlik görülə bilən işlərə yönəltməlidir.
Mütəxəssis vurğulayıb ki, nəticənin özünü deyil, həmin nəticəyə aparan gündəlik prosesi sevmək daha vacibdir. Məhz bu yanaşma qorxu hissini azaldır və məqsədlərin reallaşma ehtimalını artırır.
Psixoloqun sözlərinə görə, burada əsas məsələ ideal sonluq yox, bu gün atılan kiçik, amma davamlı addımlardır.
