Geomaqnit qasırğası
Yanvar ayının ikinci yarısında Yer kürəsində növbəti maqnit qasırğaları gözlənilir. AzPost xəbər verir ki, mütəxəssislərin məlumatına görə, 16–19 yanvar tarixlərində geomaqnit sahə qeyri-sabit olacaq və bəzi günlərdə aktivlik pik həddə çatacaq. Xüsusilə meteohəssas insanlar, arterial təzyiq problemi olanlar və xroniki stress vəziyyətində yaşayan şəxslər risk qrupunda sayılır.
16 yanvar cümə günü geomaqnit aktivliyin orta səviyyədə olacağı, günün ikinci yarısında isə qısamüddətli güclənmənin mümkünlüyü bildirilir. Bu gün əksər insanlar üçün ciddi problem yaratmasa da, bəzi şəxslərdə baş ağrısı, halsızlıq və diqqət azalması müşahidə oluna bilər.
17 yanvar şənbə günü aktivliyin daha da artacağı və güclü maqnit qasırğası səviyyəsinə çatacağı qeyd olunur. Həmin gün arterial təzyiqdə dəyişikliklər, ürək döyüntüsünün artması, əsəbilik və yuxu pozuntuları daha tez-tez baş verə bilər.
18 yanvar bazar günü də vəziyyətin sabitləşməyəcəyi, maqnit sahəsinin gün ərzində qeyri-sabit qalacağı bildirilir. Əvvəlki günlərdə yaranan narahatlıqların davam etməsi və ya güclənməsi ehtimal edilir. Xüsusilə ürək-damar xəstəlikləri olan şəxslərə diqqətli olmaq tövsiyə edilir.
19 yanvar bazar ertəsi günü aktivliyin tədricən azalacağı gözlənilsə də, tam sabitlik hələ bərpa olunmayacaq. Bu səbəbdən bəzi insanlarda halsızlıq, baş ağrısı və iş qabiliyyətinin azalması davam edə bilər.
Mütəxəssislər maqnit qasırğalarının Günəşdə baş verən partlayışlar və Günəş küləkləri nəticəsində yarandığını bildirirlər. Belə dövrlərdə yalnız texniki sistemlər deyil, insan orqanizmi də təsirlənə bilər. Ən həssas reaksiya verən sistemlər ürək-damar, sinir və hormonal tarazlıqla bağlıdır.
Həkimlər bu günlərdə həddindən artıq yorğunluqdan qaçmağı, kifayət qədər yatmağı, su qəbulunu artırmağı və ağır qidalardan uzaq durmağı məsləhət görür. Xroniki xəstəlikləri olan şəxslərə isə həkim tövsiyələrinə ciddi əməl etmək və dərmanlarını nəzarətdə saxlamaq tövsiyə olunur.
