“ABŞ hazırkı şərtlərdə kürdlər üçün ən uyğun şəraiti yaradıb. Sadəcə kürdlər çox arxayın idilər. Elə bilirdilər ki, Amerika bunlara hər şey verəcək”.
AzPost bildirir ki, bu sözləri Yaxın Şərq üzrə ekspert Kənan Rövşənoğlu Suriyanın şimal-şərqində baş verənləri şərh edərkən vurğulayıb.
Ekspertin sözlərinə görə, ABŞ hökuməti kürdlər və Dəməşq arasında saziş imzaladıb. Sazişə əsasən kürdlər bəzi statuslar əldə etdilər: Kürd dili rəsmi dövlət dili oldu, kürd bayramları, Novruz rəsmi dövlət bayramı oldu. Həmçinin kürdlər yaşayan vilayətlərdə dövlət məmurları kürd əsilli şəxslər olacaq, SDF Suriya ordusuna inteqrasiya ediləcəkdi:
“Kürdlər isə buna etiraz etdilər. Əvəzində yenə də Vaşinqtonun razılığı ilə Suriya ordusu Hasake ətrafına qədər irəlilədilər. Hazırda 4 günlük atəşkəs elan olunub”.
K. Rövşənoğlunun sözlərinə görə, 24 min İŞİD üzvü və ailələrinin saxlandığı əl-Holl düşərgəsi Suriya hökumətinin nəzarətinə keçib. İŞİD üzvlərinin saxladığı digər həbs düşərgəsindən 1400 nəfər qaçıb.
“Kürd liderləri yazır ki, Amerika bizi aldatdı. Amma elə deyil, Amerika hazırkı şərtlərdə kürdlər üçün ən uyğun şəraiti yaradıb. Sadəcə kürdlər çox arxayın idilər və elə bilirdilər ki, Amerika bunlara hər şey – indi muxtariyyət, sonra isə müstəqillik verəcək”-deyə o vurğulayıb.
Ekspertin fikrincə, ABŞ böyük dövlətdir, belə məsələlərə öz maraqları çərçivəsindən baxır: “Kürdlər 2014-2019-cu illərdə, hətta 2024-cü ilə qədər ABŞ üçün orda ən yaxın müttəfiq idi. Amma 2024-cü ilin dekabrında hər şey dəyişdi. İndi Suriya hakimiyyəti ABŞ-ın müttəfiqidir. Üstəlik, indi Amerika üçün Livan və ümumiyyətlə, bölgədə möhkəmlənməsi üçün Əhməd əş-Şaraya yol açmaq lazımdır. İkinci tərəfdən, Türkiyə ABŞ-dan kürd məsələsində gözə gorünən addım atmaq tələb edirdi”.
K. Rövşənoğlunun sözlərinə görə, kürdlər dəyişən reallığı qavraya bilmədilər: “Trampın Suriya elçisi Barrak acıq şəkildə dedi ki, artıq kürdlər bizim üçün vacib müttəfiq deyil, onların işini Suriya hökuməti görür. Əgər kürdlər daha da inad etsələr, yəqin ki, Hasakenində itirəcəklər. Ümumiyyətlə, isə ABŞ kürdlərin Suriya dövlətinə inteqrasiya olunmasını istəyir”.
Ekspertin fikrincə, “kürd planı”na tam olaraq son qoyulmayıb. Sadəcə bu mərhələdə kürdlərə “bununla kifayətlənin” deyilir. “Razılaşmaya əmək etsəydilər daha yumşaq bir keçid olacaqdı. Amma indi gərginlik artacaq. Xüsusilə də Türkiyə daxilində PKK ilə barışıq prosesi ciddi şəkildə zədələnmiş olacaq”.
