Tramp NATO ölkələrini İranla savaşa dəstək vermədiklrinə görə cəzalandırmağı düşünür.
Azpost.info bildirir ki, İranla atəşkəs müqaviləsi imzalandıqdan 24 saatdan az müddət sonra ABŞ prezidenti Donald Tramp yenidən Tehranı təhdid edir. O, “Truth” platformasındakı paylaşımında yazıb: “Əsl razılaşma olmadan döyüşlər indiyə qədər heç kimin görmədiyindən daha pis olacaq. Bütün gəmilərimiz, təyyarələrimiz və qoşunlarımız, sursatımız və onsuz da zəifləmiş düşməni məhv etmək üçün lazım olan hər şeylə, razılaşma tam tətbiq olunana qədər İranda və ətrafında yerlərində qalacaqlar.”
Tramp vurğulayıb ki, “əgər bu baş verməsə – ehtimal olduqca aşağıdır – atışma daha geniş və intensiv şəkildə başlayacaq.” O, əlavə edib ki, ABŞ geri qayıdıb və növbəti əməliyyata hazırdır.
Fransa prezidenti Emmanuel Makron atəşkəsi Tramp və İran prezidenti ilə müzakirə etdiyini və razılaşmadan məmnun olduğunu bildirib. “Ümid edirəm ki, atəşkəs Livan da daxil olmaqla, münaqişənin bütün tərəfləri tərəfindən tam şəkildə hörmət ediləcək. Bu, etibarlı və davamlı sülh üçün zəruri şərtdir”,-deyə Makron vurğulayıb. O əlavə edib ki, istənilən razılaşma İranın nüvə və raket proqramlarını, eləcə də regional siyasətini və Hörmüz boğazı üzərində nəzarətini nəzərə almalıdır.
Eyni zamanda, BMT-nin Baş katibi Antonio Quterreş İsrailin Livandakı böyük əməliyyatını pisləyərək, davam edən hücumların atəşkəsə və regiondakı sabitliyə yaratdığı təhlükəni vurğulayıb.
Wall Street Journal qəzetinin məlumatına görə, Tramp İranla müharibə zamanı ABŞ və İsraili dəstəkləməyən NATO ölkələrini cəzalandırmağı düşünür. Bu, Amerika qüvvələrinin “əməkdaşlıq etməyən” ölkələrdən dəstək verilən ölkələr üzrə yenidən bölüşdürülməsini, eləcə də İspaniya və ya Almaniyadakı bazaların bağlanmasının mümkünlüyünü nəzərdə tutur. Bu arada, Polşa, Rumıniya, Litva və Yunanıstan Hörmüz boğazına nəzarət təşəbbüsünü dəstəklədikləri üçün əlavə qüvvələr ala bilərlər.
