Keyfiyyətli yuxu həm fiziki, həm də psixoloji sağlamlıq üçün vacibdir. Mütəxəssislər bildirirlər ki, sadə gündəlik vərdişlər sayəsində gecə daha tez yuxuya getmək və səhər enerjili oyanmaq mümkündür.
AzPost xarici mediaya istinadla xəbər verir ki, ilk növbədə yatmazdan əvvəl elektron cihazlardan uzaq durmaq tövsiyə olunur. Telefon və kompüter ekranlarından yayılan mavi işıq yuxu hormonu olan melatonin istehsalını azaldır və yuxuya getməyi çətinləşdirir. Bundan əlavə, hər gün eyni saatda yatmaq və oyanmaq bədənin bioloji saatını tənzimləyir və yuxu keyfiyyətini artırır.
Mütəxəssislər həmçinin axşam saatlarında ağır və yağlı qidalardan uzaq durmağı məsləhət görürlər. Yüngül yeməklər və isti bitki çayları orqanizmi sakitləşdirir. Otağın temperaturunun uyğun olması, qaranlıq və sakit mühitin yaradılması da yuxuya getmə prosesini sürətləndirir.
Araşdırmalar göstərir ki, gün ərzində fiziki aktivliklə məşğul olan insanlar gecə daha rahat yatırlar. Bununla yanaşı, yatmazdan əvvəl meditasiya və ya dərin nəfəs məşqləri stressi azaldaraq sinir sistemini rahatladır və yuxuya keçidi asanlaşdırır.
