Qalib Həsənov – moda dünyasının yüksələn ulduzu
Gürcüstandan olan dizayner Qalib Həsənov gənc modelyerlər üçün dünyanın ən nüfuzlu müsabiqələrindən biri sayılan LVMH Prize mükafatının finalına yüksəlib.
O, buna nail olan ikinci gürcü dizaynerdir — birincisi 2015-ci ildə Demna Qvasalia olub. Müsabiqənin münsiflər heyətində moda sənayesinin ən böyük simaları, o cümlədən Conatan Anderson, Sara Burton, Mark Ceykobs, Fərrell Uilyams, Mariya Qratsiya Kyuri, Nikolya Geskier yer alır.
Qaliblər 4 sentyabrda elan olunacaq.
Qalib Həsənov Qardabani rayonunun Qaracalar kəndində anadan olub, 18 yaşına qədər Gürcüstanda yaşayıb, Azərbaycan məktəbində oxuyub və onun sözlərinə görə, o vaxt dizayner peşəsinin mövcudluğundan belə xəbəri olmayıb. Sadəcə üz və əl detalları olmadan geyim və ayaqqabı eskizləri çəkir, onları sinif yoldaşlarına hədiyyə edirdi.
2013-cü ildə modelyer Gürcüstanın BENEXT moda müsabiqəsində qalib gəlib və Milanda yerləşən Haute Future Fashion Academy-də pulsuz təhsil almaq imkanı qazanıb. Beləliklə, Tbilisi yaxınlığındakı azərbaycanlı kəndindən Milana uzanan yolu başlayıb və bu gün də orada yaşayır.
Qalib Həsənov ilk brendini kurs yoldaşı ilə birlikdə Act n°1 adı ilə yaradıb və artıq 2017-ci ildə Vogue Italia müsabiqəsində qalib olub. Daha sonra daha çox yaradıcılıq azadlığı əldə etmək üçün ayrıca layihəyə fokuslanaraq Institution adlı yeni platforma qurub və onu sadəcə brend deyil, “kreativ institut” kimi təqdim edir.
Bu gün onun yaratdığı geyimləri Beyonse, Tilda Svinton, Ledi Qaqa, Keyt Blanşett kimi dünya ulduzları geyinir və Vogue onu dünya modasının yüksələn ulduzu adlandırır.
Fevral ayında Həsənov Milanda keçirilən Moda Həftəsində Institution-un yeni kolleksiyasını təqdim edib və nümayiş beynəlxalq mətbuat tərəfindən yüksək qiymətləndirilib. İndi isə o, LVMH Prize-ın əsas mükafatı uğrunda mübarizə aparacaq: qalib 400 min avro və LVMH komandası ilə bir illik mentorluq əldə edəcək.
Institution üçün hazırladığı işlərdə Həsənov Azərbaycan xalçaçılıq ənənələrindən istifadə edir, sosial şəbəkələrdə isə geyimlərin hazırlanma prosesini göstərərək Kvemo Kartli bölgəsinin sənətkarlarının əməyini tanıdır.
