Fransada yol polisi sürücülərə qeyri-adi və təhlükəli bir xəbərdarlıq edib. Meşələrdə qıcqırmış meyvələrdən yeyərək “sərxoş olan” marallar magistral yollara çıxaraq qəza şəraiti yaradırlar.
AzPost xəbər verir ki, bu barədə Fransa jandarmeriyası məlumat yayıb.
“Meşə aperitivi” maralları özündən çıxarıb
Polisin verdiyi məlumata görə, yaz aylarında yabanı heyvanlar ağacların yeni açan tumurcuqlarını və yerdə qalan çürümüş, qıcqırmış meyvələri yeyirlər. Jandarmların “meşə aperitivi” adlandırdığı bu qidalar heyvanlarda sərxoşluq yaradır. Nəticədə marallar hərəkət trayektoriyasını itirir və gözlənilmədən avtomobillərin qarşısına atılırlar.
“Yazda vəhşi heyvanlar qıcqırmış bitki və meyvələrlə qidalanır, bu da onların davranışını proqnozlaşdırılmaz edir. Əgər yolda ‘Bambi’nin (maralın) həddini aşdığını görsəniz, sürət həddini aşağı salın və diqqətli olun” – deyə polis sürücülərə çağırış edib.
Sona və Luara departamentində qeyri-adi mənzərə
Sona və Luara departamentinin jandarmları sosial şəbəkələrdə qeyri-adi video paylaşıblar. Görüntülərdə maralın sərxoş vəziyyətdə olduğu, istiqamət hissini itirərək dairəvi şəkildə qaçdığı əks olunub.
Yerli sakinlər zarafatla qeyd edirlər ki, artıq marallar üçün də “alkotester” yoxlaması tətbiq edilməlidir. Hələlik ciddi bir yol qəzası qeydə alınmasa da, bir neçə dəfə heyvanların avtomobillərin qarşısına qəfil çıxması faktı təsdiqlənib.
Ekspertlər bildirir ki, bu təbii prosesdir və hər il yaz aylarında oxşar hallara rast gəlinir. Sürücülərə xüsusilə meşəlik ərazilərdən keçən yollarda ehtiyatlı olmaq tövsiyə edilir.
