Son illərdə sağlam qidalanma ilə bağlı aparılan araşdırmalar göstərir ki, təkcə nə yediyimiz deyil, nə vaxt yediyimiz də sağlamlığımıza ciddi təsir göstərir. Mütəxəssislərin diqqətini xüsusilə axşam yeməyinin vaxtı cəlb edir.
Azpost.info -nun məlumatına görə, İspaniyada yerləşən Barselona Qlobal Sağlamlıq İnstitutunun alimləri tərəfindən aparılan araşdırmada müəyyən edilib ki, axşam yeməyini yatmazdan ən azı iki-üç saat əvvəl qəbul edən insanlarda maddələr mübadiləsi daha effektiv işləyir. Bu isə artıq çəki riskini azaldır.
Araşdırmaya görə, gec saatlarda qidalanan insanların qanında şəkərin səviyyəsi daha uzun müddət yüksək qalır. Bu vəziyyət zamanla piylənmə və 2-ci tip diabet riskini artıra bilər.
Mütəxəssislər bildirirlər ki, insan orqanizmi bioloji saatla işləyir. Gün ərzində enerji sərfiyyatı daha yüksək olduğu üçün qəbul edilən kalorilər daha asan yandırılır. Axşam saatlarında isə metabolizm yavaşlayır.
ABŞ-da aparılan başqa bir tədqiqatda 900-dən çox insanın qidalanma vərdişləri araşdırılıb. Nəticələr göstərib ki, axşam yeməyini saat 19:00-dan əvvəl yeyənlər arasında artıq çəki göstəriciləri daha aşağı olub.
Bununla belə, dietoloqlar qeyd edirlər ki, əsas məsələ yalnız saat deyil. Axşam yeməyinin tərkibi də mühüm rol oynayır. Yağlı və şəkərli qidalar gec saatlarda qəbul edildikdə orqanizmdə daha çox piy yığılmasına səbəb olur.
Mütəxəssislər axşam yeməyi üçün balıq, tərəvəz, qatıq, salat və az yağlı protein məhsullarını tövsiyə edirlər. Həmçinin yeməkdən sonra qısa gəzinti etmək həzmi yaxşılaşdıra bilər.
Araşdırmalar göstərir ki, sağlam həyat tərzi üçün yalnız kalori hesablaması kifayət deyil. Yeməyin vaxtı, keyfiyyəti və fiziki aktivlik birlikdə qiymətləndirilməlidir.
Dietoloqların fikrincə, axşam yeməyini bir qədər erkən saatlara çəkmək həm çəkiyə nəzarət etməyə, həm də yuxu keyfiyyətini artırmağa kömək edə bilər.
Sunay Aydın
