Türkiyədə hüquq-mühafizə orqanları İzmit bələdiyyəsinin sədri Fatma Kaplan Hürriyet və həyat yoldaşı Murat Hürriyeti bələdiyyə ilə bağlı aparılan istintaq çərçivəsində saxlayıb.
Azpost.info xəbər verir ki, bu barədə Haber Global məlumat yayıb.
Məlumata görə, Fatma Kaplan Hürriyet və həyat yoldaşı ilə yanaşı, daha 31 nəfər barəsində saxlanılma qərarı verilib. Hazırda onlardan 28-i hüquq-mühafizə orqanları tərəfindən saxlanılıb.
İstintaq çərçivəsində polis səhər saatlarında İzmit bələdiyyəsinin inzibati binasında və Fatma Kaplan Hürriyetin yaşadığı mənzildə axtarış aparıb.
İstanbul Baş Prokurorluğunun açıqlamasına əsasən, saxlanılan şəxslər, o cümlədən bələdiyyə sədri və onun həyat yoldaşı cinayətkar təşkilat yaratmaq, korrupsiya və dövlət satınalmaları (tenderlər) zamanı dələduzluq ittihamları ilə üzləşiblər.
Prokurorluğun göstərişi ilə iyulun 20-də Antalya, Kırıkkale, İzmit, İstanbul və Ankara şəhərlərində eyni vaxtda xüsusi əməliyyat keçirilib.
