Rusiyanın tanınmış sənətçiləri Alla Puqaçova və Maksim Qalkin Ukraynaya mümkün səfərlə bağlı ilk dəfə açıq fikir bildiriblər. Cütlük Latviyada keçirilən “Laima Rendezvous Jūrmala” musiqi festivalında jurnalistlərin suallarını cavablandırıb.
Jurnalistlər onların gələcəkdə Kiyevə səfər etməyi planlaşdırıb-planlaşdırmadıqlarını soruşublar.
İlk olaraq Maksim Qalkin çıxış edərək Ukrayna xalqına dəstəyinin dəyişmədiyini bildirib. Bununla yanaşı, o, şəxsi səfəri ilə bağlı verilən sualı “qəribə” adlandırıb.
Daha sonra söhbətə qoşulan Alla Puqaçova Kiyevə səfəri istisna etmədiyini deyib. O bildirib ki, bunun üçün iki əsas şərt var: rəsmi dəvət alması və Ukraynada sülhün bərqərar olması.
Puqaçova münaqişənin tezliklə başa çatmasını arzulayaraq, “Gəlin bunu tez bir zamanda həll edək” məzmunlu ifadə işlədib. Bu sözlər sosial şəbəkələrdə müxtəlif reaksiyalara səbəb olub.
İstifadəçilərin bir qismi sənətçilərin səmimiyyətini şübhə altına alaraq, müharibə illərində Ukraynaya səfər etmədiklərini xatırladıb. Digər qisim isə Puqaçova və Qalkinə dəstək ifadə edən şərhlər yazıb.
Xatırladaq ki, Maksim Qalkin 2022-ci ildən sonra dəfələrlə Rusiyanın Ukraynaya qarşı hərbi əməliyyatlarını tənqid edib. O, konsertlərində ukrayna dilində mahnılar ifa edir və Ukraynaya dəstəyini açıq şəkildə ifadə edir. Bu mövqeyinə görə Rusiyada ciddi təzyiqlərlə üzləşib.
Alla Puqaçova isə Rusiyanı tərk etdikdən sonra həyat yoldaşını dəstəkləsə də, siyasi mövzularda daha az açıqlama verib.
