“Rusiya Ukraynada davam edən xüsusi hərbi əməliyyat zamanı qarşıya qoyduğu bütün məqsədlərə nail olacaq“. Bunu Rusiya Prezidenti Vladimir Putin Dövlət Dumasının VIII çağırış deputatları ilə görüşdə çıxışı zamanı bəyan edib.
Putin bildirib ki, xüsusi hərbi əməliyyatın iştirakçıları bütün Rusiya cəmiyyəti tərəfindən dəstəklənir.
“Rusiya xüsusi hərbi əməliyyat zamanı qarşıya qoyduğu məqsədlərə çatacaq. Əməliyyat iştirakçılarını bütün Rusiya xalqı, bütün cəmiyyət dəstəkləyir”, – deyə o vurğulayıb.
Rusiya Prezidenti qeyd edib ki, ölkəsi hazırda yeni dünya nizamının formalaşdığı mürəkkəb mərhələdə fəaliyyət göstərir və Rusiyanın taleyinin həll olunduğu bir dövr yaşanır.
Putin çıxışında Qərbin tətbiq etdiyi sanksiyalara da toxunaraq bildirib ki, Rusiyaya qarşı rekord sayda məhdudiyyət tətbiq olunsa da, bu sanksiyalar gözlənilən nəticəni verməyib və onları tətbiq edən ölkələrin özlərinə də zərər vurub.
O əlavə edib ki, Rusiya özünə qarşı atılan bütün “düşmən addımlarına” adekvat cavab vermək imkanına malikdir.
