ABŞ administrasiyası İranla bağlı strategiyasını dəyişərək uzunmüddətli “tükəndirmə kampaniyası” modelinə keçib.
Azpost.info bildirir ki, Livanın “Nidaa al-Watan” qəzetinin məlumatına görə, Vaşinqtonda artıq Tehrana təzyiqin nə vaxt başlayacağı deyil, onun hansı həddə qədər davam etdiriləcəyi müzakirə olunur.
Məlumata əsasən, ABŞ-ın əsas məqsədi İranı seçim qarşısında qoymaqdır: ya Vaşinqtonun şərtləri ilə tam razılaşmaq, ya da rejimin süqutuna gətirib çıxara biləcək misli görünməmiş daxili böhranla üzləşmək.
Nəşrin adının açıqlanmasını istəməyən mənbələri bildiriblər ki, Ağ Ev Tehranı ABŞ-ın baxışlarını tam əks etdirən sazişi imzalamağa məcbur etmək niyyətindədir. Vaşinqton İranın vaxt uzatmağa hesablanmış hər hansı kompromis variantına razı olmayacaq.
Qeyd olunur ki, bu sərt mesaj Livan Prezidenti Cozef Aunun Vaşinqtonda ABŞ Prezidenti Donald Trampla görüşü zamanı da Beyruta çatdırılıb.
Yeni hədəflər müəyyənləşdirilir
Yeni strategiya genişmiqyaslı hərbi əməliyyatlardan daha çox İranın iqtisadi və logistik imkanlarını sistemli şəkildə zəiflətməyə yönəlib. Nəşrin yazdığına görə, ABŞ-ın təzyiqi artıq yalnız nüvə və hərbi obyektlərlə məhdudlaşmayacaq.
Yeni hədəflər sırasına aşağıdakılar daxildir:
İran İnqilab Keşikçiləri Korpusunun (SEPAH) mühüm obyektləri və logistika şəbəkəsi;
dövlət qurumları;
əsas nəqliyyat qovşaqları, körpülər və magistrallar;
təchizat xətləri, elektrik stansiyaları və enerji infrastrukturu.
Daxili böhran hesabı
Məlumata görə, Vaşinqton strategiyasını İrandakı daxili siyasi vəziyyəti nəzərə alaraq qurur. ABŞ hesab edir ki, hakimiyyətə gəldiyi bildirilən Müctəba Xameneyi hələ də mövqeyini tam möhkəmləndirə bilməyib. Onun səhhəti ilə bağlı yayılan məlumatlar isə ölkədəki qeyri-müəyyənliyi daha da artırır.
Nəşr qeyd edir ki, İran iqtisadiyyatının zəiflədilməsi və Tehranın regional təsir imkanlarının məhdudlaşdırılması Yaxın Şərqdə, xüsusilə Livanın cənubunda vəziyyətin sabitləşməsinə də təsir göstərə bilər.
Bu həftə ABŞ Mərkəzi Komandanlığının (CENTCOM) rəhbəri general Bred Kuperin Beyruta səfəri gözlənilir. O, bölgədəki vəziyyəti qiymətləndirəcək və avqustun 4-də Romada keçiriləcək mühüm strateji görüş ərəfəsində demilitarizasiya zonalarının genişləndirilməsini müzakirə edəcək.
Nəşr vurğulayır ki, ABŞ administrasiyası üçün rəqibi tükəndirmək artıq sadəcə taktiki vasitə deyil, İran siyasətinin əsas strateji istiqamətinə çevrilib və Tehrana təzyiqin qarşıdakı dövrdə daha da güclənəcəyi gözlənilir.
N.Talıbov
