Dəriyə, bağırsaqlara və immunitetə daha çox diqqət yetirilsə də, sümük sağlamlığı çox vaxt diqqətdən kənarda qalır. Dietoloqlar xəbərdarlıq edirlər ki, xüsusilə 50 yaşdan sonra sümük sıxlığının azalması sınıq riskini əhəmiyyətli dərəcədə artırır.
“EatingWell” nəşrinin məlumatına görə, dietoloq Jaklin Klank bildirir ki, düzgün qidalanma sümüklərin möhkəm qalmasına kömək edən ən vacib amillərdən biridir. Onun sözlərinə görə, yaş artdıqca kalsium, D vitamini və digər minerallarla zəngin qidaların qəbulu xüsusi əhəmiyyət daşıyır.
Dietoloq Qreys Deroşa isə vurğulayır ki, sümük sağlamlığı yalnız yaşlılar üçün deyil, həyatın bütün mərhələlərində qorunmalıdır.
Sümükləri gücləndirən 6 qida
Tofu
Bir çox tofu növü kalsium məhlulunda hazırlandığı üçün yüksək miqdarda kalsium ehtiva edir. Mütəxəssislər məhsulun etiketini oxuyaraq kalsiumla zəngin variantlara üstünlük verməyi tövsiyə edirlər.
Qara gavalı (çernosliva)
Quru meyvə olan qara gavalı K vitamini, kalium və manqanla zəngindir. Bu maddələr kalsiumun sümüklərdə saxlanmasına və sümük toxumasının formalaşmasına kömək edir. Gündə təxminən dörddəbir stəkan qəbul etmək faydalıdır.
Qatıq
Qatıq kalsium, D vitamini və zülal baxımından zəngindir. Mütəxəssislər bildirirlər ki, adi qatıq yunan qatığından daha çox kalsium ehtiva edir və gündəlik tələbatın təxminən yarısını ödəyə bilir.
Qızılbalıq
Qızılbalıq D vitamini, omeqa-3 yağ turşuları və zülalın mühüm mənbəyidir. D vitamini kalsiumun mənimsənilməsini yaxşılaşdırır, omeqa-3 isə sümük toxumasının keyfiyyətini artırmağa kömək edir.
Kələm (Kale)
Tünd yaşıl yarpaqlı bu tərəvəz K vitamini ilə zəngindir. Bu vitamin sümüklərin formalaşmasında və kalsium mübadiləsində mühüm rol oynayır.
Tahin
Küncüt toxumundan hazırlanan tahin kalsium, maqnezium və fosfor ehtiva edir. Bu minerallar sümük sıxlığının qorunmasına və kalsiumun düzgün mənimsənilməsinə kömək edir.
Sümük sağlamlığını qorumağın digər yolları
Mütəxəssislər bildirirlər ki, düzgün qidalanma ilə yanaşı, müntəzəm fiziki aktivlik də sümük sağlamlığının qorunmasında mühüm rol oynayır. Həmçinin hər il tibbi müayinədən keçmək, D vitamini və digər vacib vitamin-mineral çatışmazlıqlarını vaxtında müəyyən etmək gələcəkdə sümük əriməsi və sınıqların qarşısını almağa kömək edir.
Həkimlər xüsusilə 50 yaşdan yuxarı şəxslərə sağlam qidalanma, aktiv həyat tərzi və mütəmadi tibbi nəzarəti həyat tərzinə çevirməyi tövsiyə edirlər.
