“Zolotaya Korona” sistemi vasitəsilə Azərbaycan və Rusiya arasında hər iki istiqamətdə pul köçürmələri müvəqqəti dayandırılıb.
Azpost.info xəbər verir ki, məhdudiyyət həm Azərbaycandan Rusiyaya, həm də Rusiyadan Azərbaycana göndərilən köçürmələrə şamil olunur.
Xidmətin dayandırılması Avropa İttifaqının Rusiyaya qarşı qəbul etdiyi son sanksiyalar paketi ilə əlaqədardır. Belə ki, “Zolotaya Korona” sisteminin hesablaşma operatoru olan “Payment Center” (“Platejnıy Sentr”) qeyri-bank kredit təşkilatı Aİ-nin sanksiya siyahısına daxil edilib. Bunun nəticəsində Azərbaycan da daxil olmaqla bir sıra ölkələr üzrə əməliyyatlar məhdudlaşdırılıb.
Hazırda “Zolotaya Korona”nın rəsmi internet səhifəsində və mobil tətbiqində Azərbaycan həm pul göndərilən, həm də pul qəbul edilən ölkələr siyahısından çıxarılıb.
Yerli tərəfdaş banklar da problemin qlobal xarakter daşıdığını təsdiqləyiblər. Unibank və Yelo Bank bildiriblər ki, sistemdə yaranmış məhdudiyyət səbəbindən köçürmələrin həyata keçirilməsi mümkün deyil.
Xidmətin nə vaxt bərpa olunacağı barədə hələlik rəsmi məlumat verilməyib.
Bundan əvvəl göndərilmiş, lakin hələ alıcıya çatmamış pul köçürmələrinin taleyi ilə bağlı da vahid açıqlama yoxdur. İstifadəçilərə köçürmələrinin statusunu “Zolotaya Korona”nın mobil tətbiqi və ya əməliyyatı həyata keçirdikləri bank vasitəsilə dəqiqləşdirmək tövsiyə olunur.
Qeyd edək ki, “Zolotaya Korona” uzun illər Azərbaycan və Rusiya arasında ən çox istifadə edilən pul köçürmə sistemlərindən biri hesab olunurdu. Xüsusilə Rusiyada çalışan azərbaycanlıların ölkəyə vəsait göndərməsi üçün bu sistemdən geniş istifadə edilirdi.
