ABŞ-nin Şimali Karolina ştatında yaşayan bir nəfər uzun illər uğurlu hesab etdiyi 7 rəqəmi sayəsində lotereyada 1 milyon dollar məbləğində əsas mükafatı qazanıb.
Azpost.info bildirir ki, bu barədə UPI agentliyi məlumat yayıb.
Biskou şəhər sakini Tomas Munyos North Carolina Education Lottery nümayəndələrinə bildirib ki, Candor V Mart mağazasında 10 dollarlıq Triple Red 777 Jackpot ani lotereya biletini görən kimi onu almağa qərar verib.
“7 mənim uğurlu rəqəmimdir. Mən ayın 7-də, 1977-ci ildə anadan olmuşam“, – deyə o bildirib.
Munyos biletdəki qoruyucu təbəqəni elə mağazada cızaraq açıb və 1 milyon dollarlıq əsas uduşun sahibi olduğunu görüb.
“Bunu görəndə bütün bədənim həyəcanlandı“, – deyə qalib bildirib.
Onun sözlərinə görə, qazandığı pulun bir hissəsini investisiyaya yönəldəcək, digər hissəsini isə ən böyük hobbilərindən biri olan klassik avtomobillərin bərpasına xərcləyəcək.
