Şagird
Rusiyada məktəbli uşaqları olan ailələrə yeni tədris ilinə hazırlıq məqsədilə hər il federal maliyyə dəstəyi göstərilməsi təklif olunub.
Azpost.info bildirir ki, bu təşəbbüslə Dövlət Dumasının sədr müavini Boris Çernışov çıxış edib. O, bununla bağlı baş nazirin müavini Tatyana Qolikovaya müraciət ünvanlayıb. Müraciətin mətnini RIA Novosti agentliyi yayıb.
Sənəddə “1 Sentyabr Kapitalı” adlı illik federal proqramın hazırlanması və məktəb yaşlı hər bir uşaq üçün ödənişin nəzərdə tutulması təklif edilir.
Təklifə əsasən, ödənişin məbləği region üzrə orta aylıq əməkhaqqına uyğun hesablanmalıdır.
1–4-cü sinif şagirdləri üçün ödəniş region üzrə orta maaşın 25 faizi,
5–9-cu siniflər üçün 30 faizi,
10–11-ci sinif şagirdləri üçün isə 35 faizi həcmində ola bilər.
Boris Çernışov hesab edir ki, vəsait yeni dərs ilinin başlamasından ən azı bir ay əvvəl valideynlərin hesabına köçürülməlidir. Bu, məktəb forması, dəftərxana ləvazimatları, dərsliklər və texniki avadanlıqların vaxtında alınmasına imkan yaradacaq.
Deputatın fikrincə, proqram müxtəlif gəlir səviyyəsinə malik ailələrin uşaqları üçün keyfiyyətli təhsilin əlçatanlığını artıracaq, eyni zamanda ailələrə əlavə sosial dəstək olacaq və doğum səviyyəsinin yüksəlməsinə də müsbət təsir göstərə bilər.
