Dünya şöhrətli aktyor Ceki Çan bu gün səhər saatlarında Bakıya gəlib.
Azpost.info bildirir ki, “Qafqazinfo”-nun əldə etdiyi məlumata görə, məşhur aktyor paytaxtdakı hotellərdən birində yerləşib. Onun gün ərzində Bakının görməli yerlərini ziyarət edəcəyi, sabahdan etibarən isə yeni filmi “Tanrının zirehi 4: Ultimatum” (Armour of God IV: Ultimatum) üçün çəkilişlərə başlayacağı bildirilir.
Son günlər sosial şəbəkələrdə Ceki Çanın guya Bakıda olduğunu əks etdirən çoxsaylı fotolar yayılmışdı. Lakin məlumata görə, həmin görüntülərdə əslində aktyorun özü deyil, onun dublyoru yer alıb. Dublyor çəkilişlərin keçiriləcəyi məkanlarda hazırlıq işləri çərçivəsində olub. Həmçinin yayılan bəzi şəkillərin süni intellekt vasitəsilə hazırlanmış olması da istisna edilmir.
Məlumata görə, “Tanrının zirehi 4: Ultimatum” filminin çəkilişləri Azərbaycan və Qazaxıstanda aparılacaq. Ceki Çan ekran əsərində yenidən məşhur “Asian Hawk” (“Asiya qartalı”) obrazını canlandıracaq.
Filmin Bakı səhnələri şəhərin bir sıra məşhur məkanlarında lentə alınacaq. Çəkilişlərin İçərişəhər, Dağüstü park, Bakı funikulyoru, Yaşıl teatr və Fəvvarələr meydanı ərazilərində aparılması planlaşdırılır.
Qeyd edək ki, “Tanrının zirehi 4: Ultimatum” filminin dünya premyerasının 2027-ci ildə keçirilməsi nəzərdə tutulur.
