ABŞ Prezidenti Donald Trampın administrasiyası “Azadlıq Günü tarifləri” adlandırılan gömrük rüsumları çərçivəsində Amerika şirkətlərindən toplanmış təxminən 100 milyard dolları geri qaytarıb.
Bu barədə BBC News ABŞ Gömrük və Sərhəd Mühafizəsi Xidmətinin məhkəməyə təqdim etdiyi sənədlərə istinadən məlumat yayıb.
Məlumata görə, geri qaytarılan vəsait hökumətin həmin tariflər hesabına əldə etdiyi ümumi gəlirin təxminən 60 faizini təşkil edir.
Bununla belə, bütün ödənişlər hələ tamamlanmayıb. Təxminən 29 milyard dollar məbləğində geri ödəniş ticarət qurumları tərəfindən yoxlanılır. Daha 1,6 milyard dolların köçürülməsi isə idxalçı şirkətlərin bank rekvizitlərini təqdim etməməsi səbəbindən gecikir.
Geri ödəniş prosesi ABŞ Ali Məhkəməsinin fevral ayında qəbul etdiyi qərardan sonra başlayıb. Məhkəmə Tramp administrasiyasının 1977-ci il tarixli Beynəlxalq Fövqəladə İqtisadi Səlahiyyətlər Aktı (IEEPA) əsasında tətbiq etdiyi genişmiqyaslı idxal tariflərini qanunsuz hesab edib.
Ağ Ev daha əvvəl bu qanunun fövqəladə vəziyyət zamanı prezidentə xarici ticarəti tənzimləmək səlahiyyəti verdiyini bildirmişdi. Lakin tətbiq edilən tariflər həm ABŞ daxilində, həm də beynəlxalq səviyyədə ciddi narazılıq doğurmuşdu.
Bir çox şirkətlər xəbərdarlıq edirdi ki, əlavə gömrük rüsumları idxal xərclərini artıracaq və nəticədə məhsulların qiymətinin bahalaşmasına səbəb olacaq.
Ali Məhkəmənin qərarından sonra iri Amerika şirkətləri artıq milyonlarla dollar geri almağa başlayıblar. Amazon şirkətinin maliyyə direktoru Brayan Olsavski bildirib ki, şirkət təkcə ikinci rübdə təxminən 600 milyon dollar geri ödəniş alıb.
Onun sözlərinə görə, bu vəsaitin bir hissəsi əlavə ödəniş etmiş müştərilərə kompensasiya kimi qaytarılacaq, qalan hissəsi isə mağazalarda qiymətlərin aşağı salınmasına yönəldiləcək.
Ekspertlər hesab edirlər ki, yeni müraciətlərə baxıldıqca və idxalçılar tələb olunan bank məlumatlarını təqdim etdikcə, ABŞ şirkətlərinə qaytarılan vəsaitin ümumi həcmi daha da artacaq.
