İnvestisiyaya necə başlamaq olar? –

Pulun yalnız yığım hesabında saxlanılması uzunmüddətli perspektivdə kifayət etməyə bilər. İnflyasiya pulun alıcılıq qabiliyyətini azaldır. İnvestisiya isə düzgün yanaşma ilə kapitalın zamanla böyüməsinə və maliyyə məqsədlərinə daha tez çatmağa imkan verə bilər.

Hara investisiya etmək olar?

Ən geniş yayılmış seçimlərdən biri səhmlərdir. Şirkətin səhmini almaq investora həmin biznesdə pay sahibi olmaq və onun dəyərinin artımından gəlir əldə etmək imkanı verir. Bununla yanaşı, səhmlərin qiymətində ciddi dəyişikliklər ola bildiyi üçün risk də yüksəkdir.

Daha aşağı risk axtaranlar istiqrazlara üstünlük verə bilərlər. İnvestor istiqraz alarkən faktiki olaraq dövlətə və ya şirkətə borc verir və bunun qarşılığında müəyyən faiz gəliri əldə edir.

Digər seçim qarşılıqlı investisiya fondları və ETF-lərdir. Bu alətlər investorun pulunu müxtəlif səhmlər, istiqrazlar və digər aktivlər arasında bölüşdürməyə imkan verir. Bu səbəbdən xüsusilə yeni başlayanlar üçün portfelin şaxələndirilməsi baxımından əlverişli hesab olunur.

Daşınmaz əmlak da investisiya variantlarından biridir. Əmlak kirayə gəliri gətirə və uzun müddətdə dəyər qazana bilər. Lakin bu investisiya növü adətən daha böyük ilkin kapital və əlavə idarəetmə tələb edir.

İnvestisiya seçərkən 3 suala cavab verin

İnvestisiya qərarı verməzdən əvvəl üç əsas məsələni müəyyənləşdirmək tövsiyə olunur: nə qədər risk qəbul edə bilərsiniz, pula nə vaxt ehtiyacınız olacaq və əsas maliyyə məqsədiniz nədir?

Məsələn, 20-30 il sonrakı pensiya dövrü üçün investisiya edən şəxsin bazardakı qısamüddətli enişləri kompensasiya etmək üçün daha çox vaxtı var. Yaxın 2-3 ildə həmin pula ehtiyacı olacaq şəxsin isə daha sabit və aşağı riskli alətlərə üstünlük verməsi məqsədəuyğun ola bilər.

Kiçik məbləğlə də başlamaq mümkündür

İnvestisiyaya başlamaq üçün minlərlə dolların olması vacib deyil. Mənbəyə görə, bəzi platformalarda hətta 10 dollarla investisiyaya başlamaq mümkündür. Fraksional səhmlər isə bahalı şirkətlərin səhmlərinin yalnız müəyyən hissəsini almağa imkan verir.

Digər yanaşma investisiyanı avtomatlaşdırmaqdır. Hər ay əvvəlcədən müəyyən edilmiş məbləğin investisiyaya yönəldilməsi bazarda “ən doğru zamanı” tapmağa çalışmaq əvəzinə davamlı yatırım vərdişi yaradır.

Bütün pulu bir yerə yatırmaq risklidir

İnvestisiyada əsas qaydalardan biri diversifikasiyadır. Pulun səhmlər, istiqrazlar, daşınmaz əmlak və digər aktivlər arasında bölüşdürülməsi bir sahədəki kəskin enişin bütün portfelə təsirini azaltmağa kömək edir.

Eyni zamanda, bazardakı gündəlik qiymət dəyişikliklərinə həddindən artıq reaksiya verməmək tövsiyə olunur. İnvestisiya portfelini hər gün yoxlamaq emosional qərarlara səbəb ola bilər. Mənbədə əksər investorlar üçün portfeli aylıq və ya rüblük nəzərdən keçirməyin kifayət etdiyi bildirilir.

Beləliklə, investisiyaya başlamaqda əsas məsələ böyük məbləğ deyil. Məqsədi müəyyənləşdirmək, qəbul edilə biləcək riski hesablamaq, kiçik məbləğlə başlamaq, investisiyaları şaxələndirmək və uzunmüddətli strategiyaya sadiq qalmaq daha vacibdir. / Valyuta.az/