Yaponiya Baş naziri Sanae Takaichi Rusiyadan Xabarovsk şəhərində Yaponiyaya qarşı müharibədə qələbəyə həsr olunmuş yeni abidəni sökməyi tələb edib.
Takaichi bildirib ki, abidənin kompozisiyası Yaponiya xalqının hisslərini təhqir edir. Onun sözlərinə görə, Tokio artıq Rusiya tərəfinə rəsmi şəkildə müraciət edərək abidənin quraşdırılmasının dayandırılmasını və sökülməsini tələb edib.
Söhbət sentyabrın 4-də Xabarovskda açılan “Yaponiya üzərində qələbə” adlı bürünc kompozisiyadan gedir.
Abidədə sovet əsgərinin üzərində xrizantema gerbi təsvir olunan sərhəd dirəyini dağıtması əks etdirilib.
Yaponiya hökumətinin rəhbəri hesab edir ki, xrizantema gerbi Yaponiyanın geniş tanınan simvollarından biridir. Buna görə də həmin simvolun dağıdılmasını təsvir edən abidənin ucaldılması Tokio üçün qəbuledilməzdir.
“Yaponiya hökuməti Rusiya tərəfdən abidənin quraşdırılmasını dayandırmağı və onun sökülməsini qətiyyətlə tələb edib. Bundan sonra da Rusiya tərəfini abidəni sökməyə israrla çağıracağıq”, – Takaichi bildirib.
Məsələ Rusiya ilə Yaponiya arasında münasibətlərin onsuz da həssas olduğu bir vaxtda gündəmə gəlib. İkinci Dünya müharibəsinin nəticələri, Kuril adaları ilə bağlı ərazi mübahisəsi və Tokio ilə Moskva arasındakı siyasi fikir ayrılıqları iki ölkə arasında münasibətlərin əsas problemləri olaraq qalır.
Xabarovskda açılan abidə isə tarixi hadisələrin müasir siyasi müstəvidə yenidən mübahisə mövzusuna çevrilməsini göstərir.
Tokionun mövqeyinə görə, məsələ yalnız tarixi hadisənin təqdimatı ilə bağlı deyil. Yaponiya tərəfi hesab edir ki, milli simvolun məhv edilməsinin təsvir olunması birbaşa olaraq yapon xalqının milli hisslərinə toxunur.
Takaichi hökumətin abidənin sökülməsi məsələsində Rusiyaya təzyiq göstərməyə davam edəcəyini vurğulayıb.
