Azərbaycan İranda regional nəqliyyat marşrutunun buraxılış qabiliyyətini artırmalı olan dəmir yolu sahəsinin tikintisinin başa çatdırılmasını sürətləndirməyə çağırıb.
Bu barədə Azərbaycanın Baş nazirinin müavini Şahin Mustafayev İranın yollar və şəhərsalma naziri Fərzanə Sadiqlə telefon danışığı zamanı bildirib.
Məlumatı Tasnim yayıb.
Tərəflər ikitərəfli münasibətlərin vəziyyətini, tranzit əməkdaşlığının genişləndirilməsini, sərhədyanı layihələri, həmçinin neft-qaz sahəsində qarşılıqlı fəaliyyəti müzakirə ediblər.
Mustafayev qeyd edib ki, Azərbaycanın ərazisində dəmir yolu xəttinin tikintisi Ağbənd ərazisinə qədər irəliləyib. Onun sözlərinə görə, İran ərazisindəki sahənin tamamlanması marşrutun nəqliyyat imkanlarını əhəmiyyətli dərəcədə artıracaq və onun regional tranzit üçün əhəmiyyətini gücləndirəcək.
Sadiq isə qaz, elektrik enerjisi və nəqliyyat sahələrində əldə olunmuş razılaşmaların işlənməsi və icrasına nəzarət üçün ən qısa müddətdə birgə komitənin yaradılmasının vacibliyini bildirib.
Nazir həmçinin məlumat verib ki, İranın nəqliyyat infrastrukturu ABŞ və İsrailin iştirakı ilə baş vermiş son müharibə zamanı zərər görüb. Bununla belə, zədələnmiş obyektlərin bərpası mövcud infrastruktur layihələrinin icrası ilə paralel davam edir. Əsas tranzit marşrutları isə fəaliyyət vəziyyətində saxlanılır.
Tərəflər regionda baş verən son hadisələri də müzakirə edib, strateji və iqtisadi əməkdaşlığı genişləndirmək niyyətlərini təsdiqləyiblər.
