pasport
Beynəlxalq səyahət və işgüzar səfərləri əsas sənəd – xarici pasport olmadan təsəvvür etmək çətindir. Lakin dünya praktikasında bununla bağlı çox nadir istisnalar var. Yer üzündə cəmi üç nəfərin dövlət sərhədlərini adi pasport olmadan keçmək hüququ mövcuddur.
Bu barədə “The European Times” yazıb.
Britaniya kralının xüsusi imtiyazı
Böyük Britaniya kralı III Çarlz bu nadir hüququ anası, kraliça II Elizabetin ölümündən sonra miras alıb.
Britaniya kral sarayının rəsmi məlumatına görə, monarx xarici pasporta ehtiyac duymur. Səbəb ölkədə bütün rəsmi şəxsiyyət sənədlərinin kralın adından verilməsidir.
Kral xarici səfərləri zamanı adi pasport əvəzinə xüsusi hökumət sənədindən istifadə edir. Bu sənəddə xarici ölkələrin hakimiyyət orqanlarına monarxın ölkəyə maneəsiz daxil olmasını təmin etmək, ona lazımi müdafiə və yardım göstərmək barədə diplomatik müraciət yer alır.
Bu istisna yalnız hakim monarxa aiddir. Britaniya kral ailəsinin digər üzvləri isə ümumi qaydada pasport almalıdırlar.
Yapon imperatorunun fərqli statusu
Oxşar qayda Yaponiya imperatoru Naruhito və imperatriça Masakoya da şamil edilir.
1971-ci ildə Yaponiya hökuməti ölkənin ilk şəxsləri üçün adi şəxsiyyət sənədlərinin rəsmiləşdirilməsinin onların xüsusi dövlət statusuna uyğun olmadığı barədə qərar qəbul edib.
İmperator və imperatriça xarici səfərlərə gedərkən adi pasportdan istifadə etmirlər. Yaponiya hökuməti bunun əvəzinə xüsusi rəsmi sənəd hazırlayır, Xarici İşlər Nazirliyi isə səfərdən əvvəl qəbul edən ölkəyə diplomatik bildiriş göndərir.
Bu xüsusi imtiyaz yalnız imperator və imperatriçaya aiddir. Yaponiya imperator ailəsinin digər üzvləri isə xarici səfərlərdə adi diplomatik pasportlardan istifadə edirlər.
Beləliklə, dünyada pasportsuz xarici səfər edə bilən şəxslər Britaniya kralı III Çarlz, Yaponiya imperatoru Naruhito və imperatriça Masakodur.
