ABŞ “Beynəlxalq Sülh və Rifah üçün Tramp Marşrutu”nun (TRIPP) yaradılması istiqamətində səylərinin növbəti mərhələsini təqdim etməyə hazırlaşır. Söhbət Ermənistanın cənubundan keçməsi planlaşdırılan nəqliyyat və infrastruktur dəhlizindən gedir.
Vaşinqton hesab edir ki, bu marşrut Cənubi Qafqaz, Mərkəzi Asiya və Qərb bazarları arasında yeni ticarət yollarının açılmasına imkan yarada bilər.
ABŞ Dövlət Departamentinin yüksək vəzifəli rəsmiləri jurnalistlərə bildiriblər ki, sentyabrın 23-də Nyu-Yorkda keçiriləcək tədbirdə TRIPP-in ötən ilki Ermənistan-Azərbaycan sülh təşəbbüsündən praktiki icra mərhələsinə keçirilməsi üçün tələb olunan institusional və maliyyə mexanizmləri müzakirə olunacaq.
Tədbirdə Ermənistan və Azərbaycanın xarici işlər nazirlərinin, Mərkəzi Asiyanın beş dövlətinin nümayəndələrinin iştirakı gözlənilir. Xüsusilə Qazaxıstan və Özbəkistanın layihəyə maraq göstərdiyi bildirilir.
ABŞ-ın xüsusi nümayəndəsi Stiv Uitkoff, respublikaçı senator Stiv Deyns, eləcə də 40-dan çox şirkətin rəhbərlərinin tədbirə qatılacağı gözlənilir. Onların böyük hissəsinin ABŞ şirkətləri olduğu qeyd edilir.
TRIPP “Orta Dəhliz”i canlandıra bilər
ABŞ rəsmilərinin sözlərinə görə, tədbirdə TRIPP-in əsas məqsədlərindən biri “Orta Dəhlizin tıxacını açmaq” və Avropanı Mərkəzi Asiya ilə birləşdirən qərbə doğru yeni ticarət marşrutunun imkanlarını genişləndirmək olacaq.
Vaşinqton hesab edir ki, belə bir marşrut regionun Rusiya, Çin və İran ərazisindən keçən tranzit yollarından asılılığını azalda bilər.
TRIPP layihəsinin Cənubi Qafqazı Mərkəzi Asiya və Qərb bazarları arasında mühüm nəqliyyat və ticarət bağlantısına çevirməsi nəzərdə tutulur.
