Artıq çəkidən qısa müddətdə xilas olmaq istəyənlər arasında müxtəlif “sürətli pəhrizlər” populyardır. Onlardan biri də qreypfrut əsaslı üçgünlük pəhrizdir. Bu meyvənin arıqlama prosesinə kömək etdiyi iddia olunur.
Bu barədə TSN nəşri yazıb.
Qreypfrut C vitamini, antioksidantlar və digər faydalı maddələrlə zəngin sitrus meyvəsidir. Lakin onun maddələr mübadiləsini sürətləndirərək qısa müddətdə bir neçə kiloqram piy yandırması barədə iddialara ehtiyatla yanaşmaq lazımdır.
Qreypfrutun hansı faydaları var?
Qreypfrut sağlam və balanslaşdırılmış qidalanmanın tərkibində faydalı meyvə ola bilər. Tərkibində C vitamini və antioksidantlar, həmçinin su və müəyyən miqdarda lif var.
Meyvənin kalorisi də nisbətən aşağıdır. Bu səbəbdən yüksək kalorili desert və qəlyanaltıların əvəzinə qreypfrut seçilməsi ümumi enerji qəbulunun azalmasına kömək edə bilər.
Lakin bu, qreypfrutun özünün piyləri “əridən” məhsul olduğu anlamına gəlmir.
Üçgünlük menyu necədir?
Mənbənin təqdim etdiyi pəhriz planında hər gün əsas qidalarla yanaşı qreypfrut və ya onun şirəsindən istifadə olunur.
1-ci gün
- Səhər: qaynadılmış yumurta, şəkərsiz yaşıl çay və ya qəhvə, yarım qreypfrut;
- Nahar: 100 qram toyuq filesi, təzə tərəvəzlər və yarım qreypfrut;
- Axşam: sobada və ya buğda hazırlanmış balıq, tərəvəz qarniri və yarım qreypfrut.
2-ci gün
- Səhər: təzə sıxılmış qreypfrut şirəsi və suda hazırlanmış yulaf;
- Nahar: 100 qram hinduşka əti, brokoli və yarım qreypfrut;
- Axşam: yüngül bulyonda tərəvəz şorbası və yarım qreypfrut.
3-cü gün
- Səhər: şəkərsiz yoqurt və yarım qreypfrut;
- Nahar: qarabaşaq sıyığı, toyuq filesi və yarım qreypfrut;
- Axşam: 100 qram azyağlı pendir və təzə sıxılmış qreypfrut şirəsi.
Pəhriz zamanı gündə ən azı 2 litr su içmək, şəkər və un məmulatlarını azaltmaq, fiziki aktivliyi artırmaq da tövsiyə olunur.
Bəs 3 günə 3 kilo necə?
Burada vacib məqam budur: 3 gün ərzində tərəzidə 3 kiloqram azalma ilə 3 kiloqram piy itirmək eyni şey deyil.
Çox qısa müddətdə çəkidə kəskin dəyişiklik əsasən orqanizmdəki suyun, bağırsaq möhtəviyyatının və qlikogen ehtiyatlarının azalması ilə bağlı ola bilər. Bu çəkinin bir hissəsi normal qidalanmaya qayıtdıqdan sonra yenidən bərpa oluna bilər.
Sağlam və davamlı çəki itkisi üçün əsas məsələ yalnız bir meyvəyə əsaslanan qısamüddətli pəhriz deyil, ümumi qidalanma, fiziki aktivlik, yuxu və uzunmüddətli enerji balansıdır.
Vacib qeyd: Qreypfrut bəzi dərmanlarla qarşılıqlı təsir göstərə bilər. Müntəzəm dərman qəbul edən şəxslər belə pəhrizə başlamazdan əvvəl həkim və ya əczaçı ilə məsləhətləşməlidirlər.
