Rusiya Baş nazirinin müavini Aleksey Overçuk və Azərbaycanın Baş nazirinin müavini Şahin Mustafayev Rusiya-Azərbaycan iqtisadi əməkdaşlıq üzrə hökumətlərarası komissiyanın həmsədrlərinin görüşünü keçiriblər.
Bu barədə Rusiya hökuməti məlumat yayıb.
Görüşdə iki ölkə arasında ticarət-iqtisadi və investisiya əməkdaşlığı, sənaye, energetika, kənd təsərrüfatı, nəqliyyat və logistika sahələrində qarşılıqlı fəaliyyət məsələləri müzakirə olunub.
Tərəflər yüksək səviyyədə əldə olunmuş razılaşmaların, həmçinin Rusiya-Azərbaycan iqtisadi əməkdaşlıq üzrə hökumətlərarası komissiyanın 24-cü iclasında qəbul edilmiş qərarların icra vəziyyətini nəzərdən keçiriblər.
Ticarət dövriyyəsinin artırılması müzakirə edildi
Görüşün əsas istiqamətlərindən biri iki ölkə arasında qarşılıqlı ticarət dövriyyəsinin artırılması olub.
Tərəflər ticarət-iqtisadi əlaqələrin genişləndirilməsi və Azərbaycan və Rusiya şirkətlərinin fəaliyyət göstərməsi üçün daha əlverişli şəraitin yaradılması ilə bağlı əlavə tədbirləri müzakirə ediblər.
Bu çərçivədə qarşılıqlı maraq doğuran investisiya və iqtisadi layihələrin həyata keçirilməsi perspektivləri də nəzərdən keçirilib.
“Şimal–Cənub” dəhlizinə xüsusi diqqət
Görüşdə nəqliyyat əlaqələrinin inkişafı və iki ölkə arasında yükdaşımaların artırılması məsələsinə xüsusi diqqət ayrılıb.
Tərəflər beynəlxalq “Şimal–Cənub” nəqliyyat dəhlizindən daha geniş istifadə imkanlarını və sərhəd-keçid məntəqələrinin fəaliyyətinin təkmilləşdirilməsini müzakirə ediblər.
Bu istiqamət Azərbaycan üçün xüsusilə əhəmiyyətlidir. Çünki “Şimal–Cənub” marşrutu ölkənin Rusiya və daha şimal bazarları ilə nəqliyyat bağlantılarını genişləndirməklə yanaşı, Azərbaycanı İran və Hindistan istiqamətində uzanan beynəlxalq yük marşrutunun əsas hissələrindən birinə çevirir.
Yükdaşımaların artması isə yalnız logistika sektoruna deyil, tranzit gəlirlərinə, anbar və gömrük xidmətlərinə, nəqliyyat şirkətlərinə və marşrut boyunca formalaşan digər biznes sahələrinə də təsir göstərə bilər.
Əməkdaşlığın hansı istiqamətdə genişlənəcəyi gözlənilir?
Tərəflər Azərbaycan və Rusiya üçün praktiki maraq kəsb edən qarşılıqlı faydalı layihələrin perspektivlərini də müzakirə ediblər.
Görüşün yekununda qarşılıqlı maraq doğuran istiqamətlər üzrə iqtisadi əməkdaşlığın daha da inkişaf etdirilməsi üçün işlərin davam etdirilməsinin vacibliyi vurğulanıb.
N.Talıblı
