Tədqiqatçılar bəzi mütəxəssislərin Bibliyada təsvir olunan Nuhun gəmisi ilə əlaqələndirdiyi geoloji formasiyada, təxminən 9 metr dərinlikdə taxta parçaları aşkar ediblər.
Azpost.info bildirir ki, bu barədə LADbible nəşri məlumat yayıb.
Tapıntı Nuhun gəmisinin axtarışı ilə məşğul olan “Noah’s Ark Scans” layihəsinin iştirakçıları tərəfindən Türkiyədə, Ağrı dağı yaxınlığında yerləşən Durupınar geoloji formasiyasında qazıntı işləri zamanı aşkarlanıb. Ərazidəki formasiyanın uzunluğu təxminən 157 metrdir və forması nəhəng gəmini xatırladır.
Araşdırma zamanı alimlər həm kömürləşmiş, həm də yanğının təsirinə məruz qalmamış taxta parçaları çıxarıblar. Layihənin vitse-prezidenti Endryu Cons onların Bibliyada təsvir edilən Nuhun gəmisi ilə əlaqəli ola biləcəyini ehtimal edib.
Lakin mütəxəssis taxta qalıqlarının bir neçə əsr əvvəl həmin ərazidə sığınacaq tapmış çobanın qaladığı ocaqdan da qala biləcəyini etiraf edib. Bir çox geoloq isə Durupınar formasiyasının təbii geoloji quruluş olduğunu düşünür.
Xatırladaq ki, layihə iştirakçıları daha əvvəl yerin altında gəminin otaq və dəhlizlərini xatırladan boşluqlar, eləcə də üzvi maddələrin miqdarı yüksək olan torpaq təbəqələri aşkar etmişdilər.
Obyektin daha ətraflı araşdırılması üçün alimlər xüsusi yeraltı robotdan istifadə etməyi planlaşdırıblar.
Nadir Talıblı
