Bir çox insan paltar yuyulduqdan dərhal sonra paltaryuyan maşının qapısını bağlamağa çalışır. Onlar bunu qapının menteşələrinin və rezin kipkəcin zədələnməməsi üçün edirlər. Lakin Miele və Siemens kimi məişət texnikası istehsalçıları əksini tövsiyə edirlər. Məlum olub ki, maşının qapısını bir müddət açıq saxlamaq onun daxilində təmizliyi qorumağa və xidmət müddətini uzatmağa kömək edir.
Almaniyanın “Chip.de” portalının məlumatına görə, yuma prosesi başa çatdıqdan sonra barabanda və qapının ətrafında nəm qalır. Maşın dərhal bağlandıqda onun daxilində isti və rütubətli mühit yaranır. Bu isə xoşagəlməz qoxuların əmələ gəlməsinə şərait yaradır. Bundan əlavə, zaman keçdikcə belə şərait gigiyena problemlərinə də səbəb ola bilər.
Miele-dən vacib tövsiyə
Miele şirkətinin mütəxəssisləri yuma başa çatdıqdan sonra maşının qapısını açıq saxlamağı məsləhət görürlər.
Bu zaman cihazın daxilində hava sərbəst dövr edir və qalıq nəmlik daha tez buxarlanır. Nəticədə baraban və rezin kipkəc quruyur. Bu da kif və rütubət qoxusunun yaranmasının qarşısını almağa kömək edir.
Qapının menteşələrinin zədələnəcəyindən narahat olmağa da ehtiyac yoxdur. Onun konstruksiyası qapı uzun müddət açıq vəziyyətdə qaldıqda belə öz ağırlığını daşımaq üçün nəzərdə tutulub.
Bundan başqa, mövcud tələblərə əsasən, paltaryuyan maşının qapısı qısamüddətli əlavə 150 nyutonluq yükə davam gətirməlidir. Bu, təxminən 15 kiloqram ağırlığa bərabərdir.
Siemens mütəxəssisləri isə bir məqama diqqət çəkir
Siemens şirkətinin mütəxəssisləri də qapının yuyulmadan sonra açıq saxlanılmasını məqsədəuyğun hesab edirlər. Lakin onlar bir vacib nüansa diqqət çəkirlər: müəyyən şəraitdə ətraf mühitin uzunmüddətli təsiri rezin kipkəcin vəziyyətinə mənfi təsir göstərə bilər.
Söhbət xüsusilə birbaşa günəş şüalarından, yüksək temperaturdan və həddindən artıq quru havadan gedir.
Bu amilləri paltaryuyan maşından nadir hallarda istifadə edilən yerlərdə, məsələn, bağ evlərində və ya mövsümi yaşayış mənzillərində nəzərə almaq xüsusilə vacibdir.
Beləliklə, paltaryuyan maşının qapısını yuyulmadan sonra dərhal bağlamaq düzgün deyil. Onu bir müddət açıq saxlamaq nəmin qurumasına, xoşagəlməz qoxuların və gigiyena problemlərinin qarşısının alınmasına kömək edir.
Sunay Aydın
