ABŞ Ukraynaya silah alınması üçün NATO müttəfiqlərini daha çox vəsait ayırmağa çağırmağa hazırlaşır.
Azpost.info bildirir ki, bu barədə Bloomberg məlumatlı mənbələrə istinadən xəbər yayıb.
Mənbələrin sözlərinə görə, “Ukraynanın prioritet ehtiyacları siyahısı” (PURL) proqramının əlavə maliyyələşdirilməsinə ehtiyac yaranıb. Çünki Vaşinqton indiyədək artıq təsdiqlənmiş silah partiyalarına görə təxminən 2 milyard dollar vəsait almayıb.
Agentliyin həmsöhbətləri bildiriblər ki, ABŞ ödəniş daxil olana qədər də silah tədarükünü davam etdirməyə hazırdır. Lakin bu, proqramın maliyyə kəsirini daha da artırır.
PURL mexanizmi ABŞ və NATO ölkələri tərəfindən 2025-ci ilin iyulunda, prezident Donald Trampın Kiyevə yardım üçün vəsait ayırmaqdan imtina etməsindən sonra yaradılıb. Proqram çərçivəsində Şimali Atlantika Alyansına üzv ölkələr Ukrayna ordusunun ehtiyacları üçün ABŞ-dan silah və sursat alınmasını maliyyələşdirirlər.
Xüsusilə, Ukraynanın hava hücumundan müdafiə sistemləri, o cümlədən “Patriot” kompleksləri üçün raketlərin böyük hissəsi bu mexanizm vasitəsilə tədarük olunur.
Ötən ay ABŞ Ukraynanın Rusiyanın enerji infrastrukturuna zərbələrinə cavab olaraq proqram çərçivəsində silah tədarükünü dayandıra biləcəyi ilə bağlı xəbərdarlıq etmişdi. Lakin Bloomberg mənbələrinin bildirdiyinə görə, bu təhdid həyata keçirilməyib və proqram fəaliyyətini davam etdirib.
Bununla belə, mənbələr qeyd ediblər ki, ABŞ prezidenti Donald Trampın bu məsələ ilə bağlı bəyanatları NATO müttəfiqləri arasında çaşqınlıq yaradıb və bəzən onları proqramın maliyyələşdirilməsi üçün vəsait köçürməyə inandırmaq cəhdlərini çətinləşdirib.
Ukrayna prezidenti Vladimir Zelenski isə daha əvvəl bildirib ki, Kiyev “Patriot” və NASAMS sistemləri üçün raket tədarükünün razılaşdırılmasını təxminən bir aydır gözləyir. Onun sözlərinə görə, Ukrayna bu il ay ərzində “Patriot” sistemləri üçün orta hesabla cəmi 12 raket əldə edir.
Pentaqon ABŞ-ın siyasətində dəyişiklik olmadığını və PURL proqramının “dəyişikliksiz fəaliyyətini davam etdirdiyini” bəyan edib.
Bununla yanaşı, NATO diplomatları Politico-ya bildiriblər ki, Avropa müttəfiqləri ABŞ-da aralıq seçkilərdən sonra Vaşinqtonun Ukraynaya dəstəyinin təhlükə altına düşə biləcəyindən narahatdırlar.
Diplomatların fikrincə, Tramp NATO-ya təzyiqi artıra, o cümlədən Kiyevə yardım proqramını məhdudlaşdıra bilər. Bu halda Avropa ölkələrinin Amerika silahlarının tədarükündə mümkün azalmanı kompensasiya etməsi çətin olacaq.
