Endirim kampaniyaları zamanı impulsiv, yəni düşünülməmiş alış-verişdən qaçmaq üçün müəyyən üsullardan istifadə etmək olar. Bunlara alış-verişdən əvvəl fasilə vermək, onlayn mağaza tətbiqlərində yadda saxlanılmış bank kartlarını silmək və digər tədbirlər daxildir.
Bu barədə ekspert Yuliya Qoltsvirt “Rossiyskaya qazeta”ya müsahibəsində danışıb.
Onun sözlərinə görə, fasilə qaydası belə işləyir: almaq istədiyiniz məhsulu səbətə əlavə edin, lakin dərhal sifariş verməyin. Bir gün və ya üç gün sonra həmin məhsula yenidən baxın.
Bundan əlavə, ekspert “bir kliklə alış” funksiyasını söndürməyi və onlayn ticarət platformalarının tətbiqlərini telefonun əsas ekranından götürməyi təklif edib. Həmçinin həqiqətən ehtiyac duyulan məhsulların siyahısını hazırlamaq və planlaşdırılmamış xərclər üçün ayrıca büdcə müəyyənləşdirmək tövsiyə olunur. İmpulsiv alış-veriş üçün hissə-hissə ödəniş imkanlarından istifadə etmək də məsləhət görülmür.
Digər mütəxəssislər isə almaq istədiyiniz məhsulu ayrıca siyahıya qeyd etməyi və bir həftə sonra ona yenidən qayıtmağı məsləhət görürlər. Bu üsul ani istəklə həqiqi ehtiyacı bir-birindən ayırmağa kömək edir.
Aylıq xərclər üçün konkret limit müəyyənləşdirmək də vacibdir. Bu, xərclərə nəzarəti insanın iradəsindən asılı vəziyyətdən çıxararaq müəyyən qaydalar əsasında həyata keçirməyə imkan verir.
Ekspertlər “Qara Cümə”ni (Black Friday) alış-veriş baxımından ən yüksək riskli dövr hesab edirlər. Çünki bu zaman insanları alış-verişə təşviq edən bütün marketinq üsulları eyni vaxtda işə düşür. Buna görə də kampaniya başlamazdan əvvəl həqiqətən ehtiyac duyulan məhsulların siyahısını hazırlamaq daha məqsədəuyğundur.
Endirimin nə dərəcədə sərfəli olduğunu qiymətləndirərkən üzərində xətt çəkilmiş köhnə qiymətdən hesablanan endirim faizinə deyil, məhsulun əvvəlki real qiymətinə, çatdırılma və əlavə xidmətlər də daxil olmaqla yekun məbləğə diqqət yetirmək tövsiyə olunur.
Endirimin olması alış-verişin avtomatik olaraq sərfəli olduğu demək deyil. Marketinqin əsas vəzifəsi alıcıya uyğun məhsulu tapmağa kömək etmək, biznes üçün isə uzunmüddətli və sadiq müştəri qazanmaqdır.
Sunay Aydın
