ABŞ 200-dən çox hindistanlı miqrantı
ABŞ-də qanunsuz yaşayan 200-dən çox hindistanlı miqrantı ABŞ hərbi-nəqliyyat təyyarəsi “C-17” ilə vətənlərinə deportasiya edilib.
“Report” TASS-a istinadən xəbər verir ki, bu barədə NDTV telekanalı məlumat yayıb.
Mənbələrin məlumatına görə, bu, ABŞ-də qalma qaydalarını pozanların deportasiyası üçün təşkil ediləcək “çoxsaylı reyslərdən” birincisidir. Onları daşıyan təyyarə Texas ştatından yola düşüb.
Hindistanlıların ABŞ-dən çıxarılması Cənubi Asiya respublikasının Baş naziri Narendra Modinin gələn həftə Vaşinqtona səfər edəcəyi barədə məlumatlar fonunda başlayıb. Bu, ABŞ Prezidenti Donald Tramp vəzifəyə başladıqdan sonra onun ilk səfəri olacaq.
Xatırladaq ki, ABŞ-ninprezidenti Donald Tramp yaxın vaxtlarda Amerika tarixində ən böyük deportasiya əməliyyatına başlayacağını vəd edib.
“Çox tezliklə biz Amerika tarixində ən böyük deportasiya əməliyyatına başlayacağıq. Bu, hazırda rekord sahibi olan Prezident Duayt Eyzenhauerdən də böyük olacaq”, – o bildirib.
Respublikaçı həmçinin ABŞ-nin 35-ci prezidenti Con Kennedi və Nobel Sülh mükafatı laureatı Martin Lüter Kinqin qətli ilə bağlı məxfi materialları dərc etmək niyyətində olduğunu açıqlayıb.
“Biz prezident Con Kennedi, onun qardaşı Robert Kennedi və doktor Martin Lüter Kinq-kiçiyin qətli, eləcə də böyük ictimai maraq kəsb edən digər mövzularla bağlı qalan qeydləri açıqlayacağıq. Bütün bunlar ictimaiyyətə açıqlanacaq”, – Tramp vurğulayıb.
