ABŞ prezidentinin xüsusi nümayəndəsi Stiv Uitkoff və Amerika liderinin kürəkəni Cared Kuşner Rusiya prezidenti Vladimir Putinlə üç saat davam edən görüşdə Vaşinqtonun Ukraynadakı münaqişənin başa çatdırılması ilə bağlı təkliflərini və Moskva ilə Kiyev arasında birbaşa danışıqların bərpa olunması imkanını müzakirə ediblər.
Bu barədə “Axios” məlumat yayıb.
Amerika mediasının məlumatına görə, görüşdə ABŞ Maliyyə Nazirliyinin sanksiya siyasətinin koordinasiyası üzrə müvəqqəti koordinatoru Cin Lanq da iştirak edib. Bu, Rusiyaya qarşı sanksiyaların müzakirə mövzularından biri olduğunu göstərə bilər.
“Axios”un qeyd etdiyi kimi, Uitkoff və Kuşner təxminən altı ay əvvəl dayandırılmış birbaşa danışıqlar prosesinə Rusiya və Ukraynanı qaytarmağa ümid edirlər. Onların Moskvaya səfəri döyüşlərin kəskin şəkildə intensivləşdiyi, Rusiya tərəfindən Ukrayna şəhərlərinə raket və pilotsuz uçuş aparatları ilə hücumların sayının artdığı bir vaxtda baş tutub.
Amerika nümayəndə heyətinə həmçinin ABŞ Milli Təhlükəsizlik Şurasının, Dövlət Departamentinin və Maliyyə Nazirliyinin nümayəndələri daxil olub. Ağ Evin nümayəndəsi bildirib ki, tərəflər yaxın həftələrdə açıqlanmalı olan “növbəti addımların məzmunlu planlarını” müzakirə ediblər.
Cin Lanqın iştirakı xüsusi diqqət çəkib. Bir gün əvvəl ABŞ maliyyə naziri Skott Bessent G20 sammiti çərçivəsində rusiyalı həmkarı ilə görüşdən sonra bildirib ki, Vaşinqton Ukraynadakı münaqişə başa çatana qədər Moskvaya iqtisadi güzəştlər təqdim etmək niyyətində deyil. Beləliklə, sanksiyalar daha geniş Amerika nizamlanma planının bir hissəsi kimi müzakirə edilmiş ola bilər.
Görüşün əvvəlində Putin Uitkoff və Kuşnerə ABŞ-ın vasitəçilik səylərinə “tam etimad” göstərdiyini bildirib. Rusiya prezidenti həmçinin Amerika nümayəndələrini danışıqlar prosesinin təhlükəsizliyini təmin etmək üçün Moskvanın zəruri olan hər şeyi edəcəyinə əmin edib.
Uitkoff Putinə keçmiş ABŞ dəniz piyadası Robert Gilmanın azad edilməsinə, eləcə də Amerika nümayəndələrinin Kiyevə səfəri zamanı Ukraynaya hava zərbələrinin müvəqqəti dayandırılmasına razılıq verdiyinə görə təşəkkür edib.
Putinin sözlərinə görə, Kiyevə zərbələrə üç günlük fasilə Moskva vaxtı ilə gecə yarısından başlayacaq. O, həmçinin Ukraynanın Rusiya ərazisinə zərbələrinin azaldığını qeyd edib. Ukrayna prezidenti Vladimir Zelenski isə öz növbəsində diplomatik təmaslar dövründə Kiyevin Moskvaya zərbələr endirməkdən çəkinməyə hazır olduğunu bildirib.
Görüşdən sonra Rusiya prezidentinin xarici siyasət məsələləri üzrə köməkçisi Yuri Uşakov Amerika nümayəndələrinin səfərə “ciddi hazırlaşdıqlarını” bildirib. Onun sözlərinə görə, Uitkoff və Kuşner nəinki döyüşlərin mümkün qədər tez dayandırılmasında maraqlı olduqlarını ifadə edib, həm də nizamlanmanın mümkün yolları ilə bağlı bir sıra ideyalar irəli sürüblər.
Moskvadakı danışıqlardan sonra Uitkoff və Kuşner Kiyevə yollanıblar. Onların səfəri Donald Trampın ikinci prezidentlik müddətinin əvvəlindən bəri administrasiya nümayəndəsinin Ukraynaya ən genişmiqyaslı səfəri olacaq.
Bununla yanaşı, danışıqlar vəziyyətin kəskin şəkildə gərginləşdiyi bir fonda keçirilir. Son günlər Rusiya Ukraynaya, o cümlədən Kiyevə və digər iri şəhərlərə raket və pilotsuz uçuş aparatları ilə hücumların intensivliyini əhəmiyyətli dərəcədə artırıb.
Vaşinqtonun Moskvaya konkret olaraq hansı təklifləri təqdim etdiyi hələlik açıqlanmır. Ağ Ev yalnız bildirib ki, növbəti addımlarla bağlı konkret planlar yaxın həftələrdə elan olunmalıdır.
