Türkiyə və ABŞ Azərbaycanla Ermənistan arasında sülh prosesini dəstəkləyir.
Bunu Türkiyənin xarici işlər naziri Hakan Fidan sentyabrın 21-də Nyu-Yorkda keçirilən “Türkiyə-ABŞ münasibətlərinin 100-cü ilinə doğru” panelində çıxışı zamanı bildirib.
Fidan deyib ki, Ankara və Vaşinqton regional və qlobal məsələlərdə əməkdaşlıq edir. Bu əməkdaşlığın Yaxın Şərqdən Qafqaza və Balkanlara qədər müxtəlif istiqamətləri əhatə etdiyini vurğulayan nazir Azərbaycan-Ermənistan arasında davam edən sülh prosesinə də toxunub.
“Qafqazda Azərbaycan və Ermənistan arasındakı sülh prosesini dəstəkləyirik”, – Fidan bildirib.
Türkiyənin xarici işlər naziri eyni zamanda Qara dənizdə gərginliyin eskalasiyası risklərinin azaldılmasının vacibliyini qeyd edib. Onun sözlərinə görə, Ankara və Vaşinqton Qara dənizdə gəmiçilik təhlükəsizliyinin təmin olunmasını və regionun problem mənbəyindən əməkdaşlıq məkanına çevrilməsini hədəfləyir.
“Cənubi Qafqazın münaqişə ilə deyil, əməkdaşlıqla tanınmasını istəyirik”
Fidanın açıqlaması onun sentyabrın 15-də Bakıya səfəri zamanı səsləndirdiyi mövqenin davamı kimi də qiymətləndirilə bilər.
Azərbaycan xarici işlər naziri Ceyhun Bayramovla birgə mətbuat konfransında Fidan Azərbaycan və Ermənistan arasında yekun sülhə doğru son dövrdə əldə olunan irəliləyişləri müsbət qiymətləndirmişdi.
O, Cənubi Qafqazın münaqişələrlə deyil, sülh, nəqliyyat, enerji, ticarət və iqtisadi inkişafla tanınmasını istədiklərini bildirmişdi.
Fidanın sözlərinə görə, Azərbaycanla Ermənistan arasında sülhün əldə olunması bölgədə yeni əməkdaşlıq mərhələsinin başlanmasına imkan yarada bilər.
ABŞ-Türkiyə xətti və Azərbaycan-Ermənistan sülhü
Fidanın son açıqlamasında diqqət çəkən məqam ABŞ-Türkiyə əməkdaşlığının Cənubi Qafqaz istiqamətinin də qeyd olunmasıdır.
Ankara Vaşinqtonla regional məsələlərdə əməkdaşlığın genişləndirilməsini istəyir. Fidan Türkiyə və ABŞ-ın Qafqazda sülh prosesini dəstəklədiyini bildirərkən, bu əməkdaşlığın regional sabitliyə töhfə verə biləcəyini vurğulayıb.
Beləliklə, Türkiyənin mövqeyində Azərbaycan-Ermənistan arasında sülhün yalnız iki ölkə arasındakı münasibətlərin normallaşması kimi deyil, Cənubi Qafqazda yeni regional əməkdaşlıq imkanları yaradan proses kimi təqdim edilməsi diqqət çəkir.
Fidanın açıqlaması həm də Ankaranın Azərbaycan-Ermənistan arasında əldə olunan razılaşmaların davam etdirilməsini və bölgədə sabitliyin möhkəmləndirilməsini dəstəklədiyini göstərir.
