ABŞ hərbçiləri İrana qarşı mümkün yeni əməliyyat fonunda regionun hava hücumundan müdafiəsini gücləndirmək üçün Texas ştatından Yaxın Şərqə “Patriot” zenit-raket kompleksləri göndərirlər.
Bu barədə “The Wall Street Journal” qəzeti məlumatlı mənbələrə istinadən yazıb.
Mənbələrin sözlərinə görə, Pentaqon mümkün gərginləşməyə hazırlaşaraq Yaxın Şərqdə hücumlara qarşı daha həssas olan bazalardan hərbi personalı çıxarır. Bundan başqa, ABŞ qüvvələri regionda sursat ehtiyatlarını artırır, bombardmançı və qırıcı təyyarələr isə zərbələr endirməyə hazır vəziyyətdə saxlanılır.
Mənbələr qeyd ediblər ki, gələn ay Yaxın Şərqdə artıq yerləşdirilmiş təxminən 20 ABŞ hərbi gəmisinə daha bir aviadaşıyıcı zərbə qrupu, həmçinin dəniz piyadalarının ekspedisiya bölməsini daşıyan desant gəmiləri qoşulmalıdır.
Qəzet məlumatlı mənbələrə istinadən yazır ki, Vaşinqton Fars körfəzi ölkələrinin bir neçəsini ABŞ Konqresinə noyabrda keçiriləcək aralıq seçkilərdən sonra İrana qarşı qısamüddətli, lakin intensiv hərbi əməliyyatlara hazırlaşdığı barədə məlumatlandırıb.
Mənbələrin bildirdiyinə görə, mümkün hədəflər sırasına İranın enerji infrastrukturu, nüvə obyektləri, həmçinin raket kompleksləri və pilotsuz uçuş aparatları daxildir.
