Oktyabrın 28-nə keçən gecə Rusiyanın Lipetsk vilayətində raket təhlükəsi elan edilib.
“Düşmən Lipetskin sənaye infrastrukturuna hücum etməyə çalışır. Kütləvi hücumun dəf edilməsi istiqamətində işlər aparılır”, – deyə “Radar Lipetsk” teleqram kanalı məlumat yayıb.
Daha sonra kanalda Novolipetsk Metallurgiya Kombinatında (NLMK) yanğın baş verdiyi barədə məlumat dərc olunub. Ukraynanın “Exilenova+” monitorinq kanalı müəssisənin ərazisində yanğın olduğunu təsdiqləyib. Kanal qeyd edib ki, “Pantsir” hava hücumundan müdafiə sistemi hava hədəfini gözdən qaçırmış ola bilər.
Lipetsk vilayətinin rəhbəri İqor Artamonov hücum və onun nəticələri ilə bağlı şərh verməyib.
NLMK Rusiyanın ən böyük polad istehsalçısıdır və dünyanın 20 ən iri polad müəssisəsi sırasına daxildir. Zavod ildə 17 milyon ton maye polad istehsal etmək gücünə malikdir. Müəssisə bu ilin iyul ayında da hücuma məruz qalmışdı.
Oktyabrın 28-də səhər tezdən Tula vilayətinin qubernatoru Dmitri Milyayev də raket təhlükəsi elan edib. Daha sonra o, regionun Ukraynaya məxsus pilotsuz uçuş aparatlarının (PUA) kütləvi hücumuna məruz qaldığını bildirib.
“PUA qalıqlarının Novomoskovsk şəhərinə düşməsi nəticəsində çoxmənzilli yaşayış binasına, fərdi yaşayış evlərinə və yaxınlıqdakı sənaye zonasının infrastrukturuna ziyan dəydiyi qeydə alınıb”, – deyə Milyayev bildirib.
Onun sözlərinə görə, xəsarət alanlar və dağıntılar barədə məlumat dəqiqləşdirilir.
“Exilenova+” kanalının məlumatına görə, Novomoskovskda hücumun hədəfi “EuroChem” qrupuna daxil olan “Azot” kimya zavodu olub. Bu müəssisə Rusiyanın ən böyük azot gübrəsi istehsalçılarından biridir.
Zavod, xüsusilə, ammonyak, ammonium nitrat, karbamid və metanol istehsal edir. Bu maddələrdən döyüş sursatlarının hazırlanmasında da istifadə olunur.
Oktyabrın 24-də Ukrayna PUA-ları Samara vilayətində yerləşən iri neft-kimya müəssisəsi “Tolyattikauchuk”a hücum edib. “Tatneft” şirkətinə məxsus zavodda yanğın baş verib, hakimiyyət orqanları isə müəssisənin yaxınlığındakı küçələrdə hərəkəti məhdudlaşdırıb.
Hücum zamanı Tolyatti İstilik Elektrik Mərkəzi də zərər görüb. Nəticədə şəhər sakinləri elektrik enerjisi və su təchizatında fasilələrlə üzləşiblər.
“Tolyattikauchuk” monomerlər, karbohidrogen fraksiyaları və avtomobil benzininə əlavə olunan maddələr istehsal edir. Zavodun istehsal etdiyi sintetik kauçuklardan isə taktiki və ballistik raketlər üçün bərk raket yanacağının hazırlanmasında istifadə olunur.
Sentyabrın 12-də Ukrayna dronları Tolyattidə ammonium nitrat, ammonyak və zəif azot turşusu istehsal edən “KuybışevAzot” müəssisəsinə də zərbə endirib.
N.Talıblı
