Afrika İttifaqı dünyanın aparıcı ölkələri qrupuna – G20-yə daxil olacaq.
Azpost.info xəbər verir ki, “Bloomberg” yazır ki, G20 onu daimi üzv kimi qəbul etmək qərarına gəlib.
Mənbənin sözlərinə görə, G20 liderləri bu barədə sentyabrın 9-10-da Dehlidə keçiriləcək sammit zamanı məlumat verəcəklər.
İndi Afrika İttifaqı “dəvət olunmuş beynəlxalq təşkilat” statusuna malikdir. “Bloomberg”ə görə, bundan sonra o, Avropa İttifaqı kimi G20-nin işində tam iştirak edə biləcək.
G20-nin qərarı inkişaf etməkdə olan ölkələri, xüsusən Afrika ölkələri də daxil olmaqla Qlobal Cənub ölkələrini beynəlxalq gündəliyin müəyyən edilməsində daha fəal iştiraka cəlb etmək prosesinin bir hissəsidir.
Afrika İttifaqı – 55 Afrika dövlətini birləşdirən beynəlxalq hökumətlərarası təşkilatdır. 2002-ci ildə yaradılıb. Onun məqsədi Afrika dövlətlərinin birliyini və həmrəyliyini gücləndirmək, onların suverenliyini və ərazi bütövlüyünü qorumaq, siyasi və sosial-iqtisadi inteqrasiyanı sürətləndirmək, qitə və onun xalqlarını maraqlandıran məsələlərdə ümumi mövqeləri müdafiə etməkdir. Ən mühüm qərarların qəbul edildiyi Afrika İttifaqı Assambleyası altı aydan bir keçirilir.
Azpost.info