Ağıllı elektrik sayğacı, elektrik enerjisi istehlakını məsafədən ölçməklə onun göstəricilərini istehlakçıya və enerji satış şəbəkəsinə ötürən avtomatlaşdırılmış cihazdır. O, istehlakçılara enerji sərfiyyatına dəqiqliklə nəzarət etməyə imkan verir və enerji təchizatı şəbəkəsinin uçot sisteminin dəqiqliyini təmin edir.
“Azərişıq” ASC-dən bildirilib ki, ağıllı sayğaclardan həm əhali, həm də sahibkarlıq subyektləri istifadə edə bilərlər. Ağıllı sayğaclar həm bir fazalı, həm də üç fazalı elektrik şəbəkələrində işləyə bilərlər. Onlar şəbəkə nasazlıqlarını və parametr sapmalarını qeyd edib, borclu şəxsin elektrik enerjisini dayandıraraq, istehlak haqqında ətraflı məlumat toplaya bilərlər. Bu funksionallıq sayəsində istehlakçılar sərf olunan elektrik enerjisinin miqdarını təhlil edə bilərlər.
Ağıllı sayğaclar enerji təchizatı operatorlarına yarımstansiyada və transformator məntəqələrində yaranan problemlərin operativ həlli üçün vacib olan nasazlıqlar, parametrlərdən kənara çıxmaları ötürmək, borclu ödəyicilərin elektrik enerjisini dayandırmaq funksiyasına malikdir. Bu sayğaclar elektrik enerjisi istehlakçılarına verilən enerji resursunun həcmini və keyfiyyətini ətraflı təhlil etməyə imkan verir.
Ağıllı elektrik sayğacları bir sıra üstünlüklərə malikdir, bunlardan biri elektrik istehlakı göstəricilərini əl ilə ötürməyə ehtiyac qalmır. Həmçinin ağıllı sayğac abonentləri məsafədən qoşmaq və ayırmaq, bir neçə tarifi dəstəkləmək, xətdə yaranan problemlərin diaqnostikası və elektrik ustasına zəng etmək zərurəti barədə bildiriş göndərmək kimi bir neçə funksiyanı eyni anda yerinə yetirmək qabiliyyətinə malikdir. Ağıllı sayğaclar aylıq elektrik enerjisi istehlakını 30 faizə qədər azalda bilər.
Beləliklə, ağıllı sayğacların mühüm üstünlüklərindən biri şəbəkədə elektrik enerjisi itkilərinin azaldılmasıdır. Bu sayğacların hesabatları dəqiqlik dərəcəsinə görə seçildiyi üçün elektrik enerjisi itkilərinin qarşısının alınmasında mühüm əhəmiyyət kəsb edir.
