Avropa İnsan Hüquqları Məhkəməsinin (AİHM) icra olunmamış qərarlarının təxminən 38 faizi Rusiyanın payına düşür.
Azpost.info xəbər verir ki, bu, AİHM-in 2022-ci il üçün qərarlarının icrasına nəzarətə dair hesabatdan məlum olur.
Sənədi Avropa Şurasının Nazirlər Komitəsi hazırlayıb.
Ötən ilin sonuna qədər AİHM-in 6112 qərarı icra olunmayıb ki, onlardan 1299-u presedent işlərə aiddir. Eyni zamanda 880 qərar (200-ü presedent) icra olunub.
Hökmlərin icrasının təkmilləşdirilməsi məsələsi Avropa Şurasının mayın 16-da və 17-də keçiriləcək sammitinin mövzusu olacaq.
Avropa Şurasının baş katibi Mariya Peyçinoviç-Buriç üzv dövlətləri daha çox siyasi iradə nümayiş etdirməyə çağırıb. Onun sözlərinə görə, bu, qanunun aliliyini təmin etmək üçün lazımdır.
2022-ci il martın 16-dan etibarən Rusiya Ukraynaya qarşı silahlı təcavüzə görə Avropa Şurasından çıxarılıb. Bu da Rusiya Federasiyasının AİHM-in yurisdiksiyasından çıxması deməkdir. Bununla belə, AİHM 2022-ci il sentyabrın 16-dək Rusiya Federasiyasını Avropa İnsan Hüquqları Konvensiyasını imzalayan ölkə hesab etməkdə davam edib. Müvafiq olaraq, Avropa Şurasının nöqteyi-nəzərindən Rusiya AİHM-in bu tarixə qədər çıxardığı qərarlara əməl etməyə borcludur.
Azpost.info
