Almaniya ilə ABŞ arasındakı münasibətlərdə ciddi dəyişikliklər baş verib.
Almaniya kansleri Fridrix Merz Berlin Xristian Demokrat İttifaqının (XDİ) yerli təşkilatının seçkiqabağı tədbirində çıxışı zamanı bildirib ki, transatlantik tərəfdaşlığın qeyd-şərtsiz olduğu dövr, böyük ehtimalla, uzun müddət geridə qalıb. Bu barədə DPA məlumat yayıb.
Merzin sözlərinə görə, ABŞ-da siyasi prioritetlər dəyişir və transatlantik ittifaqın əhəmiyyətinə yenidən qiymət verilir. O qeyd edib ki, belə bir vəziyyəti yaxın vaxtlara qədər təsəvvür etmək çətin idi.
Kansler yaranmış vəziyyətdə yeni imkanlardan istifadə etməyə çağırıb. Onun sözlərinə görə, Almaniya daha müstəqil siyasət yürütməli və üzərinə daha çox məsuliyyət götürməlidir.
Berlinlə Vaşinqton arasında münasibətlər Merzin İran münaqişəsi ilə bağlı ABŞ-ı tənqid etməsindən sonra daha da gərginləşib. Gömrük məsələləri ilə bağlı fikir ayrılıqları da tərəflər arasında əlavə gərginlik yaradıb.
Bu fonda Merz Nyu-Yorkda BMT Baş Assambleyasının yüksək səviyyəli həftəsi çərçivəsində keçiriləcək tədbirlərdə iştirak etmək üçün planlaşdırılan səfərini ləğv edib. Rəsmi olaraq isə səfərin təxirə salınmasının səbəbi kanslerin Berlində olması zərurəti ilə izah edilib.
