“Misirin təhlükəsizlik orqanları Almaniya kansleri Olaf Şoltsun ölkədə insan hüquqlarının pozulmasına dair bəyanatından sonra iqlim konfransının iştirakçılarını izləməyə başlayıb”.
Azpost.info xəbər verir ki, Almaniya Federal Cinayət İdarəsi məlumat yayıb.
“BMT-nin iqlimin qorunması sammitində (COP27) iştirak edən alman nümayəndə heyətinə qarşı Misirin təhlükəsizlik qüvvələri tərəfindən casusluq fəaliyyəti həyata keçirilir. Nümayəndə heyətinə mümkün casusluq və təxribat halları barədə xəbərdarlıq edilib”.
Noyabrın 8-də jurnalistlərə açıqlama verən Şolts Misirdə insan haqlarının pozulması hallarının olduğuna diqqət çəkib və buna misal olaraq hazırda həbsdə olan müxalif bloger Ala Əbd əl-Fəttahla bağlı vəziyyəti göstərib.
“Qərar qəbul etmək, azadlığa buraxılmasını təmin etmək lazımdır ki, aclıq edən adam ölüm həddinə çatmasın”, – kansler bildirib.
Məlumata görə, bu bəyanatdan sonra Misir təhlükəsizlik xidmətləri Almaniyadan olan nümayəndə heyətinin üzvlərini və onlarla həmfikir ölkələrin nümayəndələrini izləməyə başlayıb. Bundan başqa, Almaniyanın hüquq-mühafizə orqanları Qahirəyə yaxın şəxslərin təxribatına da işarə edib. Onların sözlərinə görə, konfransda Misir xəfiyyələri saxta şəxsiyyət vəsiqələrindən istifadə edərək özlərini BMT-nin nümayəndələri kimi göstərirlər.
Misirdə keçirilən iqlim konfransı noyabrın 18-dək davam edəcək.
Azpost.info