Almaniyada çərşənbə günü səhər tezdən Şimali Reyn-Vestfaliya əyalətinin Vuppertal-Barmen rayonunda polis xüsusi əməliyyat keçirib. Federal Polisin Mobil Nəzarət və Müşahidə dəstəsi (MKÜ) saat 6 radələrində Melanchthon küçəsində yerləşən çoxmənzilli binaya çilingər xidməti vasitəsilə daxil olub. Məqsəd 40 yaşlı, Azərbaycandan olan bir şəxsin mənzilində axtarış aparmaq və onu saxlamaq olub.
AzPost bildirir ki, bu barədə Almaniyada yaşayan hüquq müdafiəçisi Əlövsət Əliyev məlumat verib.
Görlitz prokurorluğunun göstərişi ilə keçirilən əməliyyatda həmin şəxs saxlanılıb, mənzilində və avtomobilində axtarış aparılıb. Ebersbax Federal Polis İnspeksiyasının məlumatına görə, o, 2024-cü ilin avqust və sentyabr aylarında ən azı altı dəfə Xorvatiyadan Almaniyaya, həmçinin İtaliyaya ümumilikdə 87 nəfəri qaçaqmalçılıq yolu ilə gətirməkdə ittiham olunur. Saxlanılan şəxs iddiaya görə, bu səfərlər üçün karvan avtomaşınlarını icarəyə götürüb, sürücülər cəlb edib və miqrantların daşınmasını təşkil edib.
Polisin məlumatına görə, hər səfərdə 10-23 nəfər daşınıb, qadın və uşaqlar da olub. İnsanlar uzun saatlar maşınlarda gizli saxlanılıb, maşından çıxmalarına icazə verilməyib və ehtiyaclarını avtomobilin içində ödəməyə məcbur qalıblar. Çexiya polisi bir hadisədə qaçaqmalçılıq maşınını sərhəddə saxlayaraq sürücünü həbs edib. Bu əməliyyat həmin araşdırmanın davamı kimi qiymətləndirilir.
Reyd zamanı bir neçə mobil telefon və digər sübut materialları götürülüb. Saxlanılan şəxs Vuppertal Rayon Məhkəməsində hakim qarşısına çıxarılacaq.
Əlövsət Əliyev alman mediasına iradını bildirib. Onun sözlərinə görə, bu hadisə ilə bağlı Almaniyanın bir sıra nüfuzlu media qurumları – BILD, Wuppertaler Rundschau və Sächsische Zeitung xəbərdə şəxsi “Aserbaidschaner” (azərbaycanlı) kimi təqdim edib.
“Halbuki cinsiyyət və millət cinayət kateqoriyası deyil, bu kimi hallarda şəxsin vətəndaşlığının qeyd olunması daha obyektiv olardı. Cinayətkarın milləti olmur, yalnız hüquqi statusu (vətəndaşlığı) və fərdi məsuliyyəti olur. Bu səbəbdən mətbuatın belə hallarda milli kimliyi qabartmaq əvəzinə, hüquqi faktları – vətəndaşlıq, status və konkret cinayət ittihamını önə çəkməsi daha düzgün olardı”-deyə o vurğulayıb.
