Almaniyada fevralın 23-də keçirilmiş növbədənkənar parlament seçkilərinin qalibi olan Xristian Birlik blokunda yer alan partiyalar – Xristian Demokratlar İttifaqı (CDU) və Xristian Sosialistlər İttifaqı (CSU) ilə Sosial Demokrat Partiyası arasında yeni hökumətin formalaşdırılması ilə bağlı koalisiya müqaviləsi imzalanıb.
“Almaniya üçün məsuliyyət” adlı 144 səhifəlik koalisiya müqaviləsini CDU-nun lideri Fridrix Merts, CSU-nun sədri Markus Söder və SPD-nun həmsədrləri Lars Klinqbayl ilə Saskia Eksen imzalayıblar. Bununla da koalision hökumətin qurulması rəsmən təsdiqlənib. Beləliklə Almaniya tarixində beşinci dəfə “qaralar” (Xristian Birlik) və “qırmızılar” (SPD) arasında beşinci koalision hökumət qurulub.
İmzalanma mərasimində Fridrix Merts bildirib ki, yeni koalisiya Almaniyanı islahatlar və investisiyalar vasitəsilə irəli aparmaq istəyir. Avropa gözləyir ki, Almaniya ortaq layihəyə yenidən güclü töhfə versin. “Mən çox əminəm ki, sabahdan etibarən ölkəmizi güclü, planlı və etibarlı şəkildə idarə edə biləcəyik”, – deyə o qeyd edib.
Yeni hökumətdə vitse-kansler və maliyyə naziri vəzifələrini tutan SPD-nin sədri Lars Klinqbayl isə yalnız komanda ruhu ilə uğur qazanmağın mümkün olduğunu vurğulayaraq deyib ki, Almaniyaya daha az idarəçilər, daha çox imkan yaradıcılar lazımdır.
Koalisiya hökumətinin formalaşdırılması prosesi mayın 6-da Bundestaqda keçiriləcək Kansler seçkisi ilə davam edəcək. Səsvermədə CDU lideri Fridrix Mertsin Federal Kansler seçilməsi gözlənilir. Bunun üçün parlamentin 630 deputatından 316-sının səsi lazımdır. Koalisiyada yer alan partiyalar parlamentdə 328 deputat mandatına sahibdir. Seçkilərdən sonra Kansler Almaniya Prezidenti Frank-Valter Ştaynmayer tərəfindən rəsmən bu vəzifəyə təyin ediləcək və parlamentdə and içəcək. Sonra yeni kabinet təsdiqlənəcək və koalisiya hökuməti həmin gün fəaliyyətə başlayacaq.
