Avropa İttifaqının sənaye sektoru ciddi böhranla üz-üzədir.
AzPost xəbər verir ki, bu ilin ilk səkkiz ayında qurum üzrə yetmiş iki iri müəssisə fəaliyyətini dayandırıb. Bu, son on beş ildə müşahidə olunmayan göstəricidir.
Mütəxəssislərin sözlərinə görə, hazırkı rəqəmlər 2009-cu il qlobal maliyyə böhranı zamanı qeydə alınan səviyyəyə yaxınlaşır. Həmin dövrdə səksəndən çox iri müəssisə bağlanmışdı.
Bağlanmalar ən çox İspaniyada qeydə alınıb – Avropa İttifaqında fəaliyyətini dayandıran hər beş müəssisədən biri bu ölkəyə aiddir. Daha sonra Fransa, Almaniya və Çexiya da mənfi göstəricilərlə diqqət çəkir. Ən az itki isə Xorvatiya və Daniyada müşahidə olunub, hər iki ölkədə yalnız bir müəssisə bağlanıb.
İqtisadi çətinliklər əmək bazarına da təsir edib. İndiyədək sənaye sektorunda on səkkiz min nəfər iş yerini itirib. Bu rəqəm koronavirus dövründəki səviyyədən cüzi az, amma 2009-cu il böhranında qeydə alınan iyirmi yeddi minlik işsizlərdən xeyli aşağıdır.
Ekspertlər hesab edirlər ki, əgər tendensiya davam etsə, ilin sonuna qədər bağlanan müəssisələrin sayı daha da arta bilər. Bu isə həm iqtisadi artıma, həm də sosial sabitliyə ciddi zərbə vura bilər.
