Avropada təbii qazın qiyməti son üç həftənin ən aşağı səviyyəsinə düşüb.
AZƏRTAC xəbər verir ki, Niderlandın TTF habında qazın oktyabr üzrə fyuçersləri meqavat-saat üçün 3,7 faiz azalaraq 73 avro olub.
Ekspertlərin fikrincə, anbarların doldurulması mövsümünün sonuna yaxınlaşdığı bir vaxtda Avropada qeyri-adi dərəcədə az qaz ehtiyatları son zamanlar əhəmiyyətli qiymət dəyişkənliyinə səbəb olub. Qitədə qaz qiymətləri ABŞ-nin İranla diplomatik danışıqlarda irəliləyiş olduğunu bildirməsindən sonra azalıb. Razılaşma ümidləri Hörmüz boğazında nəqliyyatın bərpa olunması gözləntilərini artırıb. Nəticədə qlobal tədarük artıra və bu, neft qiymətləri ilə birlikdə qaz qiymətlərinin də aşağı düşməsinə səbəb ola bilər.
Bildirilir ki, Yaxın Şərqdən enerji axınlarının bərpası Avropa üçün xoş xəbərdir. Əks təqdirdə, region mayeləşdirilmiş təbii qaz (LNG) təchizatı üçün daha şiddətli rəqabətlə üzləşəcək və bu da soyuq aylardan əvvəl qiymətlərin daha da yüksəlməsinə səbəb ola bilər.
“Gas Infrastructure Europe”nın (GIE) məlumatlarına görə, Avropada təbii qaz anbarlarının doluluq nisbəti mövsümi orta göstərici olan 86 faizlə müqayisədə hazırda 70 faizdən bir qədər yuxarıdır.
Şimal-qərbi Avropaya LNG daşınmasında son artımlar bazara müəyyən qədər rahatlıq gətirib, qitəyə boru kəməri axını isə Norveçin texniki xidmət cədvəli səbəbindən azalıb.
“Fitch Ratings”ə görə, hazırkı dövr üçün anbarların doluluq nisbətinin son dörd ildəki səviyyədən (80-90 faiz) xeyli aşağı olmasına baxmayaraq, Avropa İttifaqındakı qaz anbarlarının üçdə ikisindən bir qədər çoxunun dolu olması qış aylarında təchizat fasilələrinin qarşısını almaq üçün kifayətdir.
