Yay aylarında insanlar gecə saatlarında ayaqlarda qəfil yaranan qıcolmalardan daha çox şikayət edirlər. Həkimlər bildirirlər ki, bu problem təkcə yorğunluqla bağlı deyil, bəzən orqanizmdə ciddi dəyişikliklərin də xəbərçisi ola bilər.
Azpost.info xəbər verir ki, mütəxəssislərin sözlərinə görə, ayaq əzələlərinin qıcolmasına ən çox susuzluq, maqnezium və kalium çatışmazlığı, uzun müddət ayaqüstə qalmaq, eləcə də bəzi damar xəstəlikləri səbəb olur. Xüsusilə isti havalarda bədən çox maye itirdiyi üçün elektrolit balansı pozulur və əzələlər qeyri-iradi yığılmağa başlayır.
Həkimlər qeyd edirlər ki, gecə qıcolmaları davamlı xarakter alarsa, şəkərli diabet, böyrək xəstəlikləri və periferik damar problemlərinin araşdırılması vacibdir. Araşdırmalar göstərir ki, 50 yaşdan yuxarı insanların təxminən yarısı həyatında ən azı bir dəfə bu problemlə üzləşir.
Gün ərzində kifayət qədər su qəbul etmək, maqneziumla zəngin qidalar yemək və yatmazdan əvvəl baldır əzələlərini yüngül şəkildə dartmaq qıcolmaların qarşısını almağa kömək edir.
Mütəxəssislər gündəlik rasiona banan, ispanaq, badam, lobya və mineral su əlavə etməyi tövsiyə edirlər. Əgər qıcolmalar şiddətli ağrı, ayaqda şişkinlik və ya keyimə ilə müşayiət olunursa, həkimə müraciət etmək vacib sayılır.
