Misirin rəhbərliyi altında Qəzza sektorunda yerləşdirilməsi nəzərdə tutulan beynəlxalq “sabitlik qüvvələri”nin tərkibində azı 4 min hərbçi olacaq.
Bu barədə Birləşmiş Ərəb Əmirliklərinin “The National” qəzeti məlumat yayıb. Məlumata görə, ağır silahlarla təchiz olunmayacaq “sabitlik qüvvələri”nin səlahiyyətləri sülhməramlı kontingentlərə bənzəyəcək.
“The National” yazır ki, bu qüvvələrin tərkibində Misirlə yanaşı, Azərbaycan, Türkiyə və İndoneziya hərbçiləri də yer ala bilər. Lakin bu ölkələr hələ ki rəsmi olaraq təşəbbüsdə iştiraklarını təsdiqləməyiblər.
Həmin kontingent ABŞ Prezidenti Donald Trampın təşəbbüsü ilə hazırlanmış sülh planının birinci mərhələsinə uyğun olaraq İsrail ordusunun geri çəkdiyi ərazilərdə yerləşdiriləcək və Tel-Əvivin müəyyən etdiyi təhlükəsizlik zonasına daxil olmayacaq.
Beynəlxalq kontingentin əsas vəzifələrinə sahə hospitallarının yerləşdirilməsi, kritik infrastruktur obyektlərinin bərpası, həmçinin dağıntılar altında qalan fələstinlilərin cəsədlərinin çıxarılması üzrə axtarış-xilasetmə əməliyyatlarının koordinasiyası daxil olacaq. Bu prosesdə onlara təxminən 3 min yerli könüllü yardım edəcək.
Qeyd edək ki, beynəlxalq qüvvələrin Qəzza sektorunda yerləşdirilməsi Donald Trampın sülh planının ikinci mərhələsini təşkil edir.
